मोरङमा अन्तर्राष्ट्रिय बुद्धिचाल प्रतियोगिता सुरु

मोरङ- मोरङको सुन्दरहरैँचामा विराट खुला अन्तर्राष्ट्रिय बुद्धिचाल प्रतियोगिता सुरु भएको छ। विराट चेस क्लब सुन्दरहरैँचाको आयोजनामा पानस पार्टी प्यालेसमा प्रतियोगिता मंगलबारबाट सुरू भएको हो। खेलमा नेपालसहित भारत र बङ्गलादेशका एक सय २० खेलाडीले भाग लिएका छन्। 

प्रतियोगितामा चार लाख ६० हजार राशि पुरस्कार रहेको साथै अन्तर्राष्टियस्तरको प्रतियोगिता पूर्वमा  पहिलोपटक आयोजना गरिएको हो। सुन्दरहरैँचा नगरपालिकाका प्रमुख केदारप्रसाद गुरागाईंले खेलको उद्घाटन गरेका थिए। 

उनले  यस क्षेत्रको विकास, पर्यटन प्रवद्र्धनमा टेवा पुग्ने उल्लेख गर्दै कमै मात्रामा हुने यस प्रकारका खेलमा बालबालिकालाई समेत सहभागी गराउनसके उनीहरूको बौद्विक विकास हुने बताए। प्रतियोगिता  सुइस लिगअन्तर्गत नौ राउण्डमा हुने साथै  नेपालको चेस खेलको विकास र  खेलाडी उत्पादनमा समेत सहयोग पुग्ने आयोजकले बताएको छ। प्रतियोगितामा प्रथम हुने खेलाडीलाई रु एक लाख नगदसहित ट्रफी प्रदान गरिने छ।

यस्तै  दोस्रो हुनेले ७० हजार, तेस्रो हुनेले ५० हजार तथा  चौथो हुनेले रु ३० हजारसहित ट्रफी हात पार्ने उल्लेख गरिएको छ। खेल अवधिभरि विभिन्न विधामा २० जनालाई पुरस्कार प्रदान गरिनुका साथै  त्यो राशि पाँच हजारभन्दा माथि राखिएको खेल संयोजक लक्ष्मीकुमार श्रेष्ठले बताए। खेल आगामी ८ गतेसम्म सञ्चालन हुने छ।  उद्घाटन कार्यक्रमको सभापतित्व क्लबका अध्यक्ष देवेन्द्र काफ्लेले गरेका थिए।