मिडिया हबमार्फत नेपालमा फुटबल विश्वकप प्रसारण

काठमाडौं– आगामी डिसेम्बर २०२२ मा कतारमा आयोजना हुने फिफा विश्वकप फुटबल नेपालमा विभिन्न टेलिभिजन माध्यमबाट मिडिया हबले प्रसारण गर्ने भएको छ। कम्पनीले शुक्रबार राजधानीमा आयोजित कार्यक्रममा विश्वकपको प्रत्यक्ष प्रसारण अधिकार पाएको जानकारी दिएको हो। 

मिडिया हबका अध्यक्ष सोमप्रसाद धितालका अनुसार फुटबल प्रतियोगिता विश्वकप फुटबल कतार २०२२ को नेपालको भू–सतही, स्याटेलाइट, डीटीएच, केबल, ब्रोडब्यान्ड एवं मोबाइल तथा अन्य विद्युतीय प्रसारणको एकाधिकार प्राप्त गरिसकेको छ। नेपालमा विश्वकप फुटबल कतार २०२२ को लोगो, मस्कट प्रयोग, प्रसारण, प्रायोजन र प्रतिलिपिको अधिकार मिडिया हबमा रहेको उनले बताए।

विश्वकप लाइभका लागि टेलिभिजन सिग्नल प्रदायक संस्था एनआईटीभी स्ट्रीम्ज् र भायानेट कम्युनिकेसन्ससँग सहकार्यका लागि छुट्टाछुट्टै सम्झौतामा हस्ताक्षर भएको छ। उक्त सम्झौताअनुसार यी दुई कम्पनीमार्फत टेलिभिजन जडान गरेका नेपाली दर्शकले विश्वकप फुटबल २०२२ को प्रत्यक्ष प्रसारण हेर्न सक्नेछन्।

विश्वकप फुटबल नेपाली दर्शकले सबैभन्दा बढी हेर्ने र रुचाइएको एक मात्र अन्तर्राष्ट्रिय कार्यक्रम हो। ‘यसबाहेक अन्य टेलिभिजन च्यानल र सेवाप्रदायक संस्थासँग सहकार्य गर्दै हरेक घर र दर्शकसामु विश्वकप फुटबल २०२२ को प्रत्यक्ष प्रसारण पुर्‍याउनेछौं,’ धितालले भने।