अछाममा पहिरो : मृत्यु हुनेको संख्या ९ पुग्यो

काठमाडौं- अछामको पहिरोमा परेर मृत्यु हुनेको संख्या ९ पुगेको छ। अछामको कमलबजार नगरपालिका तथा ढकारी र तुर्माखाँद गाउँपालिकामा गरेर अहिलेसम्म ९ जनाको मृत्यु भएको हो। २० जना घाइते भएका छन्।

प्रहरीका अनुसार कमलबजार नगरपालिका वडा नम्बर ६ को ठाँटीघाटमा गएको पहिरोमा परी चार जनाको मृत्यु भएको छ भने ७ जना घाइते भएका छन्। घाइतेमध्ये तीन जनाको अवस्था गम्भीर रहेको । कमलबजारकै वडा नम्बर ८ मा चाउरे दमाइको घर पुरिँदा परिवारका ५ जनाको मृत्यु भएको छ।

यसैगरी ढकारी गाँउपालिकामा एउटा पुरिएर तीन जना घाइते भएका छन् भने एक जना बेपत्ता भएका छन्। तुर्माखाद गाँउपालिकामा पनि ९ जना बेपत्ता भएको जानकारी आएको जिल्ला प्रशासन कार्यालयले जनाएको छ। अहिले पनि वर्षा निरन्तर भइरहेकाले उद्धारमा कठिन भइरहेको प्रहरीले जनाएको छ।

हेलिकोप्टरबाट उद्धार गर्न गृहमन्त्रीको निर्देशन
गृहमन्त्री बालकृष्ण खाणले लगातारको वर्षापछि अछामका विभिन्न स्थानमा आएको बाढीपहिरोमा परी घाइते भएकाहरु तथा प्रभावितको उद्धारका लागि तत्काल हेलिकोप्टर पठाउन गृह प्रशासनलाई निर्देशन दिएका छन्। 

गृहसचिव टेकनारायण पाण्डे,  सुरक्षा तथा समन्वय महाशाखा प्रमुख फणिन्द्रमणि पोखरेल र विपद् तथा द्वन्द्व व्यवस्थापन महाशाखा प्रमुख प्रदीप कोइरालालाई घाइते तथा प्रभावितको उद्धारका लागि तत्काल हेलिकोप्टरको व्यवस्था गर्न मन्त्रीले निर्देशन दिएका हुन्।

अछामका प्रमुख जिल्ला अधिकारी विश्वराज मरासिनी र जिल्ला प्रहरी प्रमुख प्रहरी नायब उपरीक्षक नारायण डाँगीलाई टेलिफोन गरेर मन्त्री खाणले घटनाबारे जानकारी लिएका छन्।