२०७४ को बन्दसूची १ असोजदेखि स्वतः निष्कृय

काठमाडौं– निर्वाचन आयोगले २०७४ को प्रतिनिधि र प्रदेशसभा निर्वाचनका बेला समानुपातिक निर्वाचन प्रणालीका लागि पेस भएको बन्दसूची १ असोज राती १२ बजेदेखि कायम नरहने बताएको छ।

राष्ट्रिय सभाअन्तर्गतको राष्ट्रिय सरोकार तथा समन्वय समितिको २८ भदौको पत्र तथा २९ भदौमा राजनीतिक दलसँग गरिएको बैठकबाट प्राप्त सुझावका आधारमा आयोगले यस्तो निर्णय गरेको हो।

२०७४ मा भएको प्रतिनिधिसभा सदस्य तथा प्रदेशसभा सदस्य निर्वाचनका लागि राजनीतिक दलले पेस गरी आयोगले प्रकाशन गरेको उम्मेदवारको बन्दसूची १ असोज राती १२ बजेदेखि स्वतः कायम नरहने गरी निर्णय गरेको आयोगका प्रवक्ता शालिग्राम शर्माले बताए।

उनका अनुसार आयोगले गरेको उक्त निर्णयको जानकारी प्रतिनिधिसभा, प्रदेशसभा, संघीय संसद्, राष्ट्रिय सभाको राष्ट्रिय सरोकार तथा समन्वय समिति र राजनीतिक दलहरूलाई उपलब्ध गराइनेछ भने नेपाल राजपत्रमा प्रकाशन गर्ने निर्णय भइसकेको छ। आगामी ४ मंसिरको निर्वाचनका लागि समानुपातिकतर्फका उम्मेदवारको बन्दसूची २–३ असोजमा पेस गर्ने निर्वाचन कार्यतालिका छ।