म्यादी प्रहरीका लागि मधेस प्रदेशमा एकैदिन आठ हजारको आवेदन

जनकपुरधाम- म्यादी प्रहरीका लागि मधेस प्रदेशमा एकै दिन आठ हजारको आवेदन परेको छ। आवेदन खुलेको पहिलो दिन मधेस प्रदेशमा आठ हजारभन्दा बढीले आवेदन फारम भरेक‍ो बताइएको छ।

आगामी मंसिर ४ गते हुने प्रतिनिधिसभा र प्रदेशसभा निर्वाचनको सुरक्षाका लागि सरकारले १ लाख १५ हजार म्यादी प्रहरीका लागि आवेदन खुलाएको छ।

बिहीबार मधेस प्रदेशका ८ जिल्लामा ८ हजार ४१३ जनाले म्यादी प्रहरीका लागि आवेदन दिएको मधेस प्रदेश प्रहरी कार्यालय जनकपुरले जनाएको छ।

आवेदन दिनेमा २ हजार २९७ महिला र ६ हजार ११६ पुरुष रहेका छन्। सबैभन्दा बढी सप्तरीमा १ हजार ६०३ जनाले आवेदन दिएका छन्। जसमा ४३५ महिला र १ हजार १६८ पुरुष छन्।

यस्तै सर्लाहीमा ३५९ महिलासहित १ हजार ४२२, सिरहामा ३७५ महिलासहित १ हजार ९४, धनुषामा २६२ महिलासहित १ हजार ८४, रौतहटमा १३६ महिलासहित १ हजार ६, महोत्तरीमा २६० महिलासहित ७८५, बारामा २४१ महिलासहित ७२७ र पर्सामा २९ महिलासहित ६९२ जनाले म्यादी प्रहरीका लागि आवेदन दिएको प्रहरीले जनाएको छ।