काठमाडौं– नवौं राष्ट्रिय खेलकुदअन्तर्गतको पुरुष क्रिकेट प्रतियोगिताको पहिलो सेमिफाइनल खेल रद्द भएपछि त्रिभुवन आर्मी क्लब सिधै फाइनलमा पुगेको छ।
पहिलो सेमिफाइनलमा आर्मीले सुदूरपश्चिम प्रदेशविरुद्ध खेल्ने तय थियो। तर, बुधबार राति वर्षा भएपछि आजको खेल नै रद्द भयो। त्यसैले समूह चरणमा गरेको प्रदर्शनकै आधारमा आर्मी फाइनलमा पुगेको हो भने खेल्दै नखेली सुदूरपशिचम बाहिरियो।
यता यसअघि नै बलियो मानिएको बागमती प्रदेश र नेपाल एपीएफ क्लब पनि खेल्दै नखेली प्रतियोगिताबाट बाहिरिएका छन्। प्रतियोगिताका बलियो यि दुई टिमका सबै खेल वर्षाका कारण रद्द भए।
गएको भदौ २० गतेबाट काठमाडौंमा नवौं राष्ट्रिय खेलकुदअन्तर्गतको पुरुष क्रिकेट प्रतियोगिता सुरु भएको हो। त्यसको समूह चरणको खेल बुधबार नै सकिएपछि बिहीबार बिहान पहिलो सेमिफाइनल आयोजना गरिएको थियो।
तर गएराति परेको भारी वर्षाका कारण मैदान ओसिलो भएपछि खेल रद्द भएको छ। जारी प्रतियोगिताका रद्द भएको यो १७ औं खेलसमेत हो। आजसम्म तय भएका २५ खेलमध्ये १७ खेल रद्द भइसकेका छन्।