विराटनगर शेखरका लागि साँच्चै 'विरासत' होला?

इटहरी- नेपाली कांग्रेसका नेता डा शेखर कोइराला सुशील कोइरालाको निधनपछि पार्टीभित्र प्रतिपक्षीको भूमिकामा छन्। १३औँ महाधिवेशनमा सर्वाधिक मतका साथ केन्द्रीय सदस्यमा विजयी भएसँगै उनी सभापतिको तयारीमा लागे। पार्टी सभापति शेरबहादुर देउवालाई खबरदारी गर्ने र असन्तुष्ट कार्यकर्तासँगको भेटघाटलाई तीव्रता दिएका उनले १४औँ महाधिवेशनपछि संस्थापन इतर समूहको मुख्य नेता बनेका छन्। 

महाधिवेशनमा ५ जना आकाङ्क्षीमध्ये दोस्रो भएपछि पुनः दोस्रो चरणमा मतदान भयो। सभापतिका आकाङ्क्षी रहेका विमलेन्द्र निधि र प्रकाशमान सिंहले शेरबहादुर देउवालाई नै सघाएपछि कोइरालाले उपविजेतामा चित्त बुझाउनु परेको थियो। 

कोइराला परिवारको विरासत 'होल्ड' गर्ने विषयमा विवाद हुँदा सुजाता कोइराला र शशांक कोइरालाले साथ नदिएपनि शेखरको काँधमा संस्थापन इतर समूहको नेतृत्व गर्ने जिम्मेवारी महाधिवेशनको नतिजाले सुम्पिएको छ। देउवा इतर समूहको नेता मानिएका रामचन्द्र पौडेलले सहयोग नगरे पनि शेखरले त्यो जिम्मेवारी खोसेर लिएका छन्।