खेल पत्रकार गौतम र राईलाई एनएसजेएफको सम्मान

काठमाडौं- नेपाल खेलकुद पत्रकार मञ्च (एनएसजेएफ) ले २७औं स्थापना दिवसको अवसरमा सातदोबाटोस्थित अन्तर्राष्ट्रिय खेलकुद परिसरमा दुई जना खेल पत्रकारलाई सम्मान गरेको छ।

एनएसजेएफ खेल पत्रकारिता पुरस्कारबाट वरिष्ठ पूर्व खेलकुद पत्रकार जयदेव गौतम र सुमन भोम्जन स्मृति युवा खेल पत्रकारिता पुरस्कारबाट गीता राई सम्मानित भएका हुन्।

हरेक वर्ष आफ्नो स्थापना दिवसको अवसरमा एनएसजेएफले एक जना सिनियर र एक जुनियर खेल पत्रकारलाई सम्मान गर्ने गरेको छ। यसै मेसोमा यो वर्ष गौत र गिता राई सम्मानि भए।

पत्रकारलाई सम्मान गर्दै राष्ट्रिय खेलकुद परिषद् (राखेप) का सदस्य सचिव टंकलाल घिसिङले नेपाली खेलकुद पत्रकारितामा एनएसजेएफको भूमिका अहम रहेको बताएका छन्।  

प्रमुख अतिथिको रुपमा सम्बोधन गर्दै उनले नेपाली खेलकुदलाई गतिशील बनाउन खेलकुद पत्रकारले उल्लेखनीय योगदान गरेको जनाएका छन्।

'खेलकुदको संवाहकको रुपमा रहेको यो मञ्च र नेपाली खेलकुदको सञ्चार गरिदिने महत्वपूर्ण जिम्मेवारी तपाईहरुले निर्वाह गर्दै आइरहनु भएको छ। नेपाली खेलकुदमा रहेका प्रतिभालाई अघी बढाउने कुरामा होस्,खेलकुदलाई गतिशिल बनाउन यहाँहरुले गर्नु भएको योगदानको प्रशंशा गर्न चाहन्छु', राखेप सदस्य सचिव घिसिङले भने।

खेल पत्रकारिता अवार्डस्वरूप गौतमलाई २५ हजार रुपैयाँ प्रदान गरिएको छ। स्व. सुमन भोम्जन युवा खेलकुद पत्रकारिता अवार्डबाट पुरस्कृत राईलाई ल्यापटप प्रदान गरिएको छ।