अमिषाका दुई गोलमा नेपाल ६-० ले विजयी

काठमाडौं- घरेलु मैदानमा जारी छैटौं संस्करणको महिला साफ च्याम्पियनसिप फुटबलमा नेपाल सेमिफाइनल प्रवेश गरेको छ। सोमबार भएको समूह चरणको अन्तिम खेलमा नेपालले श्रीलंकालाई ६-० हराउँदै अन्तिम चारमा यात्रा पक्का गरेको हो। 

त्रिपुरेश्वरस्थित दशरथ रंगशालामा नेपाललाई जित दिलाउन अमिषा कार्कीले दुई गोल गरिन्। यस्तै कुमारी घिसिङ, सरु लिम्बु, अमृता जैशी र दिपा शाहीले एक एक गोल गरे।

खेलको नवौं मिनेटमा रश्मीले गोल गर्दै नेपाललाई सुरुआती अग्रता दिलाएकी थिइन्। ११औं मिनेटमा सरुले, १७ औं मिनेटमा अमृताले र पहिलो हाफको इन्जुरी समयमा दिपाले गोल गरेपछि नेपालले पहिलो हाफमा ४-० को अग्रता बनायो।

७६औं मिनेटमा अमिषाले र दोस्रो हाफको पनि इन्जुरी समयमा अमिषाले नै दोस्रो गोल गरेपछि नेपालको पक्षमा सहज जित निस्किएको हो। उता श्रीलंकाले भने नेपालविरुद्ध गोल गर्न सकेन।

जितसँगै समूह 'बी' को नेपालले ६ अंक जोडेको छ। भुटान यो समूहको उपविजेता बनेको छ। भुटानले २ खेलमा ३ अंक जोड्यो। दुवै खेल हारेपछि श्रीलंका भने बाहिरिएको छ।  

समूह 'ए' बाट भारत र बंगलादेशले अन्तिम चारमा स्थान बनाएका छन्। श्रीलंकासँगै माल्दिभ्स र पाकिस्तान बाहिरिसकेका छन्।