सत्ता गठबन्धनले आज पनि टुंगो लगाउन सकेन सिटको भागबन्डा, फेरि सर्‍यो भाका

काठमाडौं- सत्तामा रहेका ५ दलका शीर्ष नेताको बैठक आइतबार पनि निष्कर्षविहीन भएको छ। सिट बाँडफाँड टुंगो लगाउने दाबी गरिएको बैठक सोमबारका लागि सारिएको छ। बैठक भोलि बिहान ८ बजे बस्ने गरी बैठक टुंगिएको हो।

बैठकबाट बाहिरिँदै नेकपा एकीकृत समाजवादीका सम्मानित नेता झलनाथ खनालले बैठकमा कार्यदलले तयार पारेको प्रतिवेदनबारे रिपोर्टिङ मात्रै भएको बताए। 

‘बैठकमा कार्यदलले तयार पारेको प्रतिवेदनका बारेमा त्यहाँ रिपोर्टिङ भयो। कार्यदलले केही कुरा मिलाएको छ, केही बाँकी छ। त्यस विषयमा भोलि फेरि छलफल गछौं,’ उनले भने।

बिहान ८ बजे बस्ने बैठकले सिट बाँडफाँट टुंगो लगाउने दाबी नेता खनालको छ।

शनिबार नै सिटको भागबन्डा मिलाउनका लागि बैठक डाकिएको भएपनि जनता समाजवादी पार्टीका अध्यक्ष उपेन्द्र यादव नपुगेपछि आइतबारका लागि सारिएको थियो। पछिल्लो समय गठबन्धनका शीर्ष नेताको बैठक बस्दै बिना निष्कर्ष टुंगिदै आएको छ। 

सिट बाँडफाटका लागि गठित कार्यदलले जिम्मेवारी पूरा नगरी अधुरो प्रतिवेदन बिहीबार शीर्ष नेताहरूलाई बुझाएपनि प्रतिवेदनमा केकति विषयमा समझदारी भएको भन्ने विवरण सार्वजनिक भएको छैन। 

माओवादी, नेकपा एस, जसपा र कांग्रेसले आफ्नो वास्तविक शक्ति भन्दा बढी सिटमा दाबी गरेका कारण भागबन्डा मिलाउन नसकिएको राष्ट्रिय जनमोर्चाको भनाइ छ।