जसपालाई कमजोर नठान्न उपेन्द्र यादवको चेतावनी

काठमाडौं- जनता समाजवादी पार्टीका अध्यक्ष उपेन्द्र यादवले गठबन्धनमा सम्मानजनक स्थान दिनुपर्ने बताएका छन्। सम्मानजनक स्थान नपाए जसपा गठबन्धनमा बस्न बाध्य नहुने चेतावनी दिएका हुन्।

पिछडावर्ग महासंघ (ओबिसी)को राष्ट्रिय सम्मेलनलाई शनिबार जनकपुरमा सम्बोधन गर्दै यादवले जसपालाई उचित स्थान नदिए गठबन्धनबाट बाहिर गएर एक्लै निर्वाचन लड्ने चेतावनी दिएका छन्। उनले सोही प्रकारको चेतावनी यसअघि काठमाडौंमा पनि दिएका थिए।

यादवले गठबन्धनको नाममा आत्मघाती कदम उठाउन बाध्य नरहेको बताए। लोकतन्त्र र संविधानमाथि आक्रमण गर्ने अभिप्रायले प्रतिनिधिसभा भंग गरिँदा जसपा नै सबैभन्दा पहिले सडक आन्दोलनमा उतारिएको दाबी गर्दै यादवले प्रतिगमनकारी शक्तिलाई परास्त गर्नका लागि गठबन्धनमा जान तयार भएको बताए।

लोकतन्त्र र संविधानको रक्षाका लागी जसपाले सडक आन्दोलन गरेको बताउँदै उनले आज गठबन्धनमा जसपालाई कमजोर बनाउने षडयन्त्र भइरहेको आरोप लगाए।