निर्वाचनका समयमा सीडीओले हैन, आयोगले प्रशासन हात लिनुपर्छ : ओली

विराटनगर- नेकपा एमालेका अध्यक्ष तथा पूर्व प्रधानमन्त्री केपी शर्मा ओलीले निर्वाचनका समयमा निर्वाचन आयोगले प्रशासन आफ्नो हात लिनुपर्ने बताएका छन्। गत वैशाखमा सम्पन्‍न स्थानीय तह निर्वाचनमा आयोगको भूमिका कमजोर देखिएको उनको भनाई छ।

विराटनगर विमानस्थलमा शनिबार पत्रकारसँग कुराकानी गर्दै अध्यक्ष ओलीले अघिल्लो निर्वाचनमा आयोगले धाँधली रोक्न नसकेको आरोप लगाए। उनले भने, ‘आयोग कमजोर देखियो, धाँधली रोक्न सकेन। निर्वाचनका समयमा प्रशासन आफ्नो हातमा लिन सकेनन्।’

निर्वाचनका समयमा आयोगले प्रशासन आफ्नो हातमा लिनुपर्ने उनको भनाई छ। अध्यक्ष ओलीले भने,‘सीडीओले सञ्चालन गर्ने होइन।’ सत्ताको आदेश पालना गर्ने तरिकाले निर्वाचन कसरी सम्पन्‍न हुन्छ भन्दै प्रश्न गरे। उनले भने, ‘मनपरि तरिकाले राज्य संयन्त्र सञ्चालन गर्ने राजनीतिक दल अहिले सत्तामा रहेको देखिदेखि आयोगले प्रशासन आफ्नो हातमा लिनु परेन?’ 

प्रशासनको सञ्‍चालन निर्वाचन आयोगले आफ्नो हातमा लिएर न्यायाधीशमार्फत् निर्वाचनको विधिबाट कसरी निर्वाचनलाई स्वच्छ, निष्पक्ष बनाउन सकिन्छ त्यतातिर आयोगले ध्यान दिनुपर्ने अध्यक्ष ओलीले बताए।   

राष्ट्रपतिले पुनर्विचारका लागि फिर्ता पठाएको नागरिकता विधेयक हुबहु पास गरेर सत्ता पक्षले उदण्डता देखाएको उनको आरोप छ। सरकारले अनावश्यक तनाव मात्र बढाउन खोजेको ओलीले बताए। 

शनिबार विराटनगरमा आयोजित एमाले निकट बुद्धिजीवि परिषद्को प्रदेश सम्मेलन र जितिया कार्यक्रममा सहभागि हुन अध्यक्ष ओली विराटनगर आएका हुन्।