कांग्रेसका नेतालाई गठबन्धनविरुद्ध भाषणबाजी नगर्न गृहमन्त्री खाणको चेतावनी

काठमाडौं– नेपाली कांग्रेसका नेताहरूलाई गठबन्धनविरुद्ध भाषणबाजी नगर्न गृहमन्त्री बालकृष्ण खाणले सचेत गराएका छन्। खाणले प्रदेशसभा र प्रतिनिधिसभा निर्वाचनअघि गठबन्धन तोड्ने पक्षमा कांग्रेस नरहेकाले त्यसविरुद्धमा पार्टी नेताहरूले भाषणबाजी गर्दै हिँड्न नमिल्ने बताएका हुन्।

कांग्रेसमा आबद्ध नेपाल तरुण दल काभ्रेले शनिबार काठमाडौंमा आयोजना गरेको कार्यक्रममा गृहमन्त्री खाणले यस्तो बताए। कांग्रेस गठबन्धनमा आबद्ध भएकाले पार्टीका नेता, कार्यकर्ता गठबन्धनले उठाएको उम्मेदवारको पक्षमा उभिनु राजनीतिक धर्म भएको उनको धारणा छ।

‘आगामी प्रदेशसभा र प्रतिनिधिसभा निर्वाचनको  सिट बाँडफाँटमा पार्टीले आफ्नो अडान राख्नुपर्दछ। तर गठबन्धन तोडेर हेरौं भनेर भन्नुहुन्छ भने कांग्रेस केन्द्रीय समितिले अहिले गठबन्धन तोड्दैन,’ उनले भने। उनले कांग्रेसका केन्द्रीय सदस्य सदस्यहरूले पार्टीका तरुण साथीहरूलाई बोलाउने र गलत भ्रम हुने गरी भाषण गर्न नहुने बताए। ‘हामी गठबन्धनमा आबद्ध छौं। गठबन्धनको उम्मेदवारलाई जिताउनु राजनीतिक धर्म र दायित्व हो,’ उनले भने।