दार्चुलाको नौगाड पहिरोमा दुईको मृत्यु, पाँच जना बेपत्ता

काठमाडौं- शुक्रबार रातिदेखि परेको अविरल वर्षाले नौगाड गाउँपालिका-१ सल्ला भन्ने ठाउँमा पहिरो जाँदा दुई जनाको ज्यान गएको छ। ज्यान गुमाउनेमा ३७ वर्षीया चिमडी ठगुन्ना र १३ वर्षीया मती ठगुन्ना रहेका छन्।

घरमाथिबाट आएको पहिरोमा परि दुवै जनाको घटनास्थलमै मृत्यु भएको स्थानीय प्रहरीले जनाएको छ।

यस्तै पहिरोमा परेर पाँच जना घाइते भएका छन्।  घाइते हुनेमा बीरा ठगुन्ना, फागुनी ठगुन्ना, रम्भा ठगुन्ना, महामती ठगुन्ना र पावर्ती ठगुन्ना रहेका छन्।

पहिरोका कारण ८ घर पुरिएका छन्। पहिरो पन्छाउन सुरक्षाकर्मीसहितको टोली अहिले घटनास्थलतर्फ गइरहेको प्रहरीले जनाएको छ।

यता दार्चुला सदरमुकामस्थित महाकाली र लास्कु नदीमा आएको बाढीले १४ घर बगाएको छ।