काठमाडौं-२ बाट प्रकाश अधिकारीको स्वतन्त्र उमेदवारी घोषणा

काठमाडौं- काठमाडौं क्षेत्र २ बाट प्रकाश अधिकारीले स्वतन्त्र उमेदवारी घोषणा गरेका छन्। अधिकारीले सामाजिक सञ्जाल फेसबुकमार्फत् मंसिर ४ मा हुने प्रतिनिधि सभाको निर्वाचनमा काठमाडौं २ बाट स्वतन्त्र रुपमा चुनाव लड्ने घोषणा गरेका हुन्।

कानुन व्यवसायीसमेत रहेका उनले आफूमा नयाँ व्यवस्थाबारेको भिजन, मिसन र एक्सन रहेको बताएका छन्। मूलधारका राजनीतिक दलमा निराशाजनक कार्यसम्पादन रहेको भन्दै प्रतिनिधि सभा निर्वाचनमा स्वतन्त्र उमेदवार बन्ने घोषणा उनले बताएका छन्। 

संसदलगायत राज्यको नीति निर्माण तहमा प्रभावकारी तरिकाले काम गर्नसक्ने युवाको खडेरी रहेको अवस्थामा आफ्नो उमेदवारीले वर्तमान संसदीय व्यवस्थाभित्रका विकृतीका बारेमा विरोध गर्ने उनको भनाइ छ। 

राज्यको नीति निर्माणको तहमा कानुनी ज्ञान भएको व्यक्ति आवश्यक पर्ने उनले जिकिर गरेका छन्। काठमाडौं २ नेकपा एकीकृत समाजवादीका अध्यक्ष माधवकुमार नेपालकै क्षेत्र हो।