चेल्सीको मुख्य प्रशिक्षकमा ग्राहम पाटर

काठमाडौं– थोमस टुचेलको बर्खास्तगीपछि चेल्सीले नयाँ प्रशिक्षकका रुपमा ब्राइटनका प्रशिक्षक ग्राहम पाटरलाई नियुक्त गर्ने भएको छ। चेल्सीका मालिक टोड वोहोलीले पाटरलाई भेटेर प्रशिक्षक बन्न राखेको प्रस्तावलाई उनले सहजै स्वीकार गरेको बताइएको छ।

चेल्सीले पाटरसँगै चेल्सीले माउरिसियो पोचेटिनो र जिनेदिन जिदानलाई पनि विकल्पमा राखेको थियो। च्याम्पियन्स लिगमा क्रोएसियाको डिनामो जाग्रेबसँग १–० पराजित भएको भोलिपल्ट चेल्सीले टुचेललाई बर्खास्त गरेको थियो। 

चेल्सीले फ्रान्क लाम्पार्डलाई बर्खास्त गर्दै २०२१ मा टुचेललाई मुख्य प्रशिक्षक नियुक्त गरेको थियो। टुचेलको चेल्सीसँगको सम्झौता २०२४ सम्म रहेको थियो। नयाँ सिजनको सुरुवातसँगै राम्रो लयमा नरहेको चेल्सीले टुचेललाई सम्झौता नसकिँदै बर्खास्त गरेको हो। टुचेलले चेल्सीलाई त्यही सिजन च्याम्पियन्स लिगको उपाधि जिताएका थिए।