कांग्रेसले जनतामाझ जाँदा अंशबन्डा गरेकामा पूर्वराष्ट्रपति यादवको चिन्ता

काठमाडौं– पूर्वराष्ट्रपति डा. रामवरण यादवले नेपाली कांग्रेसले जनताको बीचमा जान पनि अंशबन्डा गरिरहेको भन्दै चिन्ता व्यक्त गरेका छन्। बिहीबार काठमाडौंमा भएको बीपी साहित्य सम्मान एवं बीपी सेनानी सम्मान तथा स्मृति लोकार्पण कार्यक्रममा उनले यस्तो बताएका हुन्। 

कांग्रेसको अहिलेको अवस्था हेर्दा रामराम भन्नुसिवाय अरू नरहेको उनले उल्लेख गरे। बीपीका राजनीतिक चिन्तन अध्ययन गर्ने फुर्सद कुनै राजनीतिक कार्यकर्ता र नेतालाई नरहेको र टिकट किनेर पार्टी प्रवेश गर्ने क्रम बढेको उनको भनाइ छ। ‘बीपीको जेल डायरी, बीपीको आत्मवृत्तान्त, बीपीले बोलेका राजनीतिबारेका विषय कांग्रेसीलाई पढ्न फुर्सद छैन। सोझै कांग्रेस छिर्छन् किनकि टिकट किन्नेलाई कांग्रेसी भनिएको छ’, उनले भने।

पूर्वराष्ट्रपति यादवले चुनावका लागि कांग्रेसले पैसामा टिकट बेचिरहेकामा चिन्ता लागेको सुनाए। उनले भने, ‘तपाईंहरुले सुन्नुभएकै होला, समानुपातिकमा टिकट बिक्री भएको छ। पालिकाको टिकट बिक्री भएको छ। अहिले विधिबारे चर्चा गरिराख्नुपर्ने, आदर्शबारेमा कुरा गर्नै छाडिसके।’

पूर्वराष्ट्रपति यादवले कांग्रेस पार्टीमा रहेर पसिना बगाउनेको भन्दा पैसा दिएर टिकट किन्नेको मूल्यांकन बढी हुँदै गइरहेको बताए। पूर्वराष्ट्रपति यादवले स्थानीय तह निर्वाचनमा वडा र पालिकामा टिकट बिक्री भएको दाबी गर्दै पार्टीमा विधि, आदर्श पालना र सम्मान हुन छाडेको सुनाए। 

उनले कांग्रेसीको पुर्खा बिर्सिएर अहिले जनतासमक्ष जान अरू पार्टीसँग मिलेर अंशबन्डा गर्नु लज्जाको विषय भएको बताए। ‘बीपी, गणेशमान, किसुनजी, गिरिजाजस्ता महापुरुषको नाम सुन्दै गदगद हुन्छ तर अहिले देशको अवस्था कस्तो छ? बीपीको एक गुन पनि हामीमा छैन। कांग्रेसीमा हुनैपर्ने हो। कांग्रेसबारे अब राम, राम भन्ने बेला भइसकेको छ,’ उनले भने।