काठमाडौं– श्रीलंकामा जारी यू–१७ साफ च्याम्पियन्सपमा नेपालले बुधबार भुटानविरुद्ध पहिलो खेल खेल्दै छ। यो खेल नेपाली समयानुसार बेलुका ८ः१५ मा कोलम्बोस्थित रेसकोर्स अन्तर्राष्ट्रिय रंगशालामा हुनेछ।
पहिलो खेलमै पराजित भुटान विरुद्ध मैदान उत्रिँदै गर्दा नेपाललाई एक खेलअगावै सेमिफाइनल पुग्ने मौका छ। नेपाली टोलीको नेतृत्व ‘ए’ डिभिजन क्लब चर्च ब्वाइजमा खेल्ने प्रशान्त लक्षामले गर्नेछन्। भारतसँग पराजित भएको भुटान नेपालसँग पनि पराजित भए प्रतियोगिताबाट बाहिरिनेछ।
नेपालले दोस्रो खेल २४ भदौ शुक्रबार भारतविरुद्ध खेल्दै छ। बुधबारको खेल जिते नेपालले भारतसँगको खेलमा पराजित भए पनि कुनै असर पर्ने छैन। त्यसैले नेपाललाई यस दिनको खेल जित्नैपर्ने दबाब रहेको छ। किनकी साबिक विजेता भारत प्रतियोगिताकै सबैभन्दा बलियो टिम हो। यो संस्करणको उपाधिको मुख्य दावेदार टिम भारतलाई नै मानिएको छ।
प्रतियोगितामा ६ टोलीको सहभागिता छ। समूह ‘ए’मा श्रीलंका, माल्दिभ्स र बंगादेश रहेका छन्। त्यस्तै, समूह ‘बी’मा नेपाल, भारत र भुटान रहेका छन्। समूह ‘ए’मा बंगलादेश तीन अंकका साथ समूहको शीर्ष स्थानमा छ भने नेपाल सम्मिलित समूह ‘बी’मा भारत तीन अंकका साथ समूहको शीर्ष स्थानमा रहेको छ।
यसअघि नै पहिलो खेल खेलिसकेको भुटान भारतसँग ३–० ले पराजित भएको थियो। तर भुटानका प्रशिक्षक तासी हिदिहारु ताकाहासाहीले पहिलो खेलमा सोचेअनुसारको लयमा खेल्न नसकेको र खेललाई वर्षाले पनि प्रभाव पारेको बताउँछन्। त्यसैले बुधबार नेपालविरुद्ध राम्रो प्रदर्शन गर्दै पहिलो जित निकाल्ने दाबी उनको छ। साथै, सेमिफाइनल पुग्ने सम्भावनामा आशावादी रहेको प्रशिक्षक ताकासाहीले बताएका छन्।
नेपालले दोस्रो खेल २४ भदौ शुक्रबार भारतविरुद्ध खेल्दै छ। भुटानविरुद्धको बुधबारको खेल जिते नेपालले भारतसँगको खेलमा पराजित भए पनि कुनै असर नपर्ने हुँदा जित्नैपर्ने दबाब छ।
त्यस्तै, पहिलो खेलको सुरुआत सुखद गर्नेमा नेपाली प्रशिक्षक विश्वस्त देखिएका छन्। उनले नेपाली टोलीको तयारि राम्रो भएको र पहिलो खेलमै जित निकाल्नेमा विश्वस्त रहेको बताएका हुन्। ‘हाम्रो टिमको तयारी एकदम राम्रो भइरहेको छ। सबै खेलाडी एकजुटका साथ अभ्यास गरिरहेका छन्। टिममा सबै खेलाडी फिट छन्। यसले गर्दा टिममा कुनै पनि समस्या छैन। एकेडेमी तथा डिभिजन लिग खेलेका खेलाडी छन्। त्यसले गर्दा हाम्रो टिमले धेरै राम्रो प्रदर्शन गर्नेछ’, श्रेष्ठले भने।
साफ यू–१७ अहिलेको संस्करणसम्म आइपुग्दा ६ पटक आयोजना भइसकेको छ। यीमध्ये चार प्रतियोगिता नेपालले आयोजना गरेको छ। ६ संस्करणमा तीन पटक फाइनल खेलेको नेपाल उपाधिविहीन छ। नेपालका लागि अन्य उमेर समूहमा झैं यू–१७ मा पनि भारत नै बाधा बन्दै आएको छ। नेपालले खेलेका तीन वटै फाइनल खेलमा भारतसँग पराजित भएको छ।
यसअघि भएका खेलमा समूह ‘ए’मा बंगलादेशले आयोजक श्रीलंकामाथि सानदार जित निकालेको थियो। सोमबार भएको खेलमा आयोजकमाथि बंगलादेशले ५–१ को जित निकालेको थियो। पहिलो खेलमा सानदार जित निकालेको बंगलादेशले बुधबार हुने पहिलो खेलमा माल्दिभ्ससँग खेल्दै छ। समूह चरणपछि शीर्ष दुई टोली सेमिफाइनलमा पुग्नेछन्।
२७ भदौमा सेमिफाइनल तथा २९ भदौमा उपाधिका लागि प्रतिस्पर्धा हुनेछ। प्रतियोगिताका सबै खेल रेसकोर्स अन्तर्राष्ट्रिय रंगशालामा हुनेछन्।
नेपाली टिम
गोलकिपरः कृषाल मोक्तान, समीर चन्द, रुविन बोगटी
डिफेन्डरः अश्विन घोरासैनी, सेमन्त थापा, उनेश बुढाथोकी, मदन पौडेल, दीपक थापा मगर, निशान्त तामाङ, युनिष मगर, विक्रम तामाङ, प्रितम कार्की, धीरज विश्वकर्मा
मिडफिल्डरः प्रशान्त लक्षाम, मिराक लिङ्देन, सरोज दारलामी, हरिशराज भट्ट, लच्छु थापा
फरवार्डः निरज कार्की, धनसिंह विक, विनोद केसी, सिजल राई, सुवास बम