काठमाडौं– नेपाल क्रिकेट संघ (क्यान) ले नेपाल टी २० लिगको विषयमा आयोजना गर्न लागेको पत्रकार सम्मेलन रद्द गरेको छ। प्राविधिक कारण देखाउँदै क्यानले आजको पत्रकार सम्मेलन रद्द गरेको हो।
नेपाली राष्ट्रिय क्रिकेट टोलीका कप्तान सन्दीप लामिछानेविरूद्ध नाबालिगलाई बलात्कार गरेको आरोपमा जाहेरी परेपछि क्यानले पत्रकार सम्मेलन अचानक रद्द गरेको बताइएको छ। क्यानले टी २० को विषयमा बाफलस्थित होटल हायत प्यालेसमा पत्रकार सम्मेलन आयोजना गरेको थियो।
सन्दीपमाथि आरोप लागेको विषयमा क्यानले अहिलेसम्म आधिकारिक धारणा सार्वजनिक गरेको छैन। यसबारे धारणा तय गर्न क्यानले आज आकस्मिक बैठक डाकेको छ। बैठकले क्यानको कप्तानी निलम्बन गर्न सक्ने बुझिएको छ।
सन्दीप हाल क्यारेबियन प्रिमियर लिग (सिपिएल) खेल्न क्यारेबियन मुलुक सेन्ट लुसियामा छन्। उनी आबद्ध जमैकाले भोलि सेन्ट लुसियासँग खेल्दैछ। सिपिएल आगामी अक्टोबर १ सम्म हुँदैछ भने सन्दीप आबद्ध जमैकाको अन्तिम लिग खेल सेप्टेम्बर २५ मा छ।