काठमाडौं- नयाँ संस्करणको युरोपियन च्याम्पियन्स लिग मंगलबार रातिबाट सुरु भएको छ। गएराति युरोपका ठूला मानिएका टिमहरू म्यानचेस्टर सिटी, पेरिस सेन्ट जर्मेन(पिएसजी) र साबिक विजेता रियल मड्रिडले जित निकालेका छन्।
स्पेनको सभिया सहरमा भएको खेलमा घरेलु टिम सभियाविरुद्ध प्रिमियर क्लब म्यानचेस्टर सिटीले ४-० को जित निकालेको छ। इर्लिङ ब्रट हाल्यान्डको दोहोरो गोलमा सिटीले सहज जित निकालेको हो।
खेलको २०औं मिनेटमा हाल्यान्डले अग्रता बनाएको खेलको पहिलो हाफमा सेभिया एक गोलले पछि थियो। ५८औं मिनेटमा फिल फोडेले अग्रता दोब्बर बनाउँदा हाल्यान्डले ६७औं मिनेटमा अर्को गोल थपेका थिए।
त्यस्तै, रुविन डियासले इज्युरी समयमा गोल गरेसँगै सिटीले फराकिलो जित निकाल्यो। समूह जि कै अर्को खेलमा भने बोरुसिया डर्टमन्डले कोपनहेगनलाई ३-० गोलअन्तरले हराएको छ।
पिएसजीको मैदानमा भएको खेलमा भने युभेन्टुले घरेलु टिमसँग २-१ को हार बेहोरेको छ। समूह एच अन्तर्गतको खेलमा पिएसजीलाई जित दिलाउन दुवै गोल एम्बाप्पले गरेका थिए।