चितवन–३ बाट प्रचण्ड एकल सिफारिस

काठमाडौं– नेकपा माओवादी केन्द्रका अध्यक्ष पुष्पकमल दाहाल  ‘प्रचण्ड’ चितवन निर्वाचन क्षेत्र नम्बर–३ बाट प्रतिनिधिसभा सदस्य उम्मेदवार सिफारिस भएका छन्। आइतबार बसेको पार्टीको ३ नम्बर क्षेत्रीय निर्वाचन परिचालन समिति बैठकले प्रचण्डको नाम एकमतले उम्मेदवारका रुपमा सिफारिस गरेको हो।

प्रचण्ड ०७४ को निर्वाचनमा पनि सोही क्षेत्रबाट प्रतिनिधिसभा सदस्य निर्वाचित भएका थिए। आगामी निर्वाचनका लागि उनको नाम गोरखा–१ बाट पनि सिफारिस भएको छ। प्रचण्डले भने आफू चितवन–३ बाटै चुनाव लड्ने स्पष्ट गरिसकेका छन्। प्रचण्डको चुनावी कमाण्डर उनकै छोरी अर्थात् भरतपुर महानगरपालिकाकी मेयर रेनु दाहाल हुने तय भइसकेको छ। ण्

पार्टीको बैठकले चितवन–३ अन्तर्गतका दुवै प्रदेशसभाका लागिसमेत प्रत्यक्षतर्फका उम्मेदवार सिफारिस गरेको छ। प्रदेश ३ (क) मा प्रकाश कँडेलसहित तीन जना र ३ (ख) मा गोपाल न्यौपानेसहित ८ जनाको नाम सिफारिस भएको छ।