शंकर पोखरेल प्रदेशमा नदोहोरिने, दाङ-२ बाट एकल सिफारिस

काठमाडौं- नेकपा एमालेले दाङका तीन निर्वाचन क्षेत्रमा प्रत्यक्षतर्फ प्रतिनिधिसभा सदस्यका लागि उम्मेदवार सिफारिस गरेको छ। दाङ क्षेत्र नम्बर २ बाट एमाले महासचिव शंकर पोखरेलको नाम सिफारिस भएको छ।

२०७४ सालको निर्वाचनमा प्रदेशसभामा निर्वाचित भएर मुख्यमन्त्री बनेका पोखरेल अब भने प्रदेशमा नबस्ने भएका छन्।

अहिले पोखरेल सिफारिस भएको क्षेत्रमा २०७४ मा नेकपा माओवादी केन्द्रका कृष्णबहादुर महरा निर्वाचित भएका थिए। त्यतिखेर एमाले र माओवादीबीच चुनावी गठबन्धन भएको थियो। उनीहरू साझा घोषणापत्रका साथ निर्वाचनमा गएका थिए। 

एमालेले दाङको निर्वाचन क्षेत्र नं. ३ बाट तीन जनाको नाम प्रतिनिधिसभा सदस्य पदका लागि सिफारिस गरेको छ। एमाले उपाध्यक्ष युवराज ज्ञवालीको नाम एक नम्बरमा सिफारिस गरिएको छ भने तुलसीपुर उपमहानगरपालिकाका यसअघिका मेयर तथा केन्द्रीय सदस्य घनश्याम पाण्डे र केन्द्रीय सदस्य कोमल वलीको नाम दोस्रो र तेस्रो नम्बरमा सिफारिस भएको छ।

निर्वाचन क्षेत्र नं. १ मा पनि प्रतिनिधिसभा सदस्य पदका लागि तीन जनाको नाम सिफारिस भएको छ। एक नम्बरमा नेतृ शान्ता चौधरी, दुई नम्बरमा गंगा चौधरी र तीन नम्बरमा रेवतीरमण शर्माको नाम सिफारिस गरिएको छ।