सुनसरी–३ बाट विजयकुमार गच्छदारको मात्र नाम सिफारिस

काठमाडौं– सुनसरी क्षेत्र नम्बर ३ बाट प्रतिनिधिसभा सदस्य निर्वाचनका लागि नेपाली कांग्रेसका नेता विजयकुमार गच्छदारको एकल नाम सिफारिस भएको छ। कांग्रेस सुनसरी क्षेत्र नम्बर ३ को बैठकले भ्रष्टाचार आरोपमा सांसद पदबाट निलम्बित गच्छदारको नाम सर्वसम्मत सिफारिस गरेको हो। 

बालुवाटारस्थित ललिता निवासको जग्गा किनबेच प्रकरणमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेपछि गच्छदार निलम्बनमा परेका छन्। उक्त मुद्दा अहिले पनि विशेष अदालतमा विचाराधीन छ। 

गच्छदार सिफारिस भएको क्षेत्र सुनसरी–३ बाट नेकपा एमालेले भने भगवती चौधरीलाई उम्मेदवार बनाउने लगभग पक्का छ। ०७४ को निर्वाचनमा गच्छदार भगवतीलाई नै पराजित गरेर निर्वाचित भएका हुन्।  

अघिल्लो पटक गच्छदारले ३८ हजार ९७२ मत ल्याउँदा चौधरीले ३८ हजार ६५१ मत पाएकी थिइन्। यो क्षेत्र गच्छदारले लगातार ६ पटक चुनाव जितेको क्षेत्र हो। उनी २०४८, २०५१ र २०५६ को निर्वाचनमा नेपाली कांग्रेसबाट निर्वाचित भएका थिए भने २०६४ सालको पहिलो संविधानसभा निर्वाचनमा मधेसी जनअधिकार फोरम र २०७० सालको संविधानसभा निर्वाचनमा मधेसी जनअधिकार फोरम (लोकतान्त्रिक)बाट चुनाव जितेका थिए। त्यसपछि कांग्रेसमा फर्किएका उनले २०७४ सालमा पनि बाजी मारे।