राखेपको वार्षिकोत्सवमा तीन जना दीर्घ सेवा पदकबाट सम्मानित

पोखरा- राष्ट्रिय खेलकुद परिषद् (राखेप)को ५९औं वार्षिकोत्सवमा तिन जना सम्मानित भएका छन्। राखेपअन्तर्गत पश्चिमाञ्चल क्षेत्रिय खेलकुदका कार्यालय प्रमुख लक्ष्मण प्रसाद योगी, लेखा प्रमुख डिवी नेपाली र जिल्ला खेलकुद विकास समिति कास्कीका कार्यालय प्रमुख प्रकाश बराल दिर्घ सेवा पदकबाट सम्मानित भएका हुन्। सो अवसरमा अवसरमा चार खेलाडीसहित १६ जनालाई शनिबार सम्मान गरेको छ।

सम्मानित हुने खेलाडीमा सिनियरतर्फ पुरुषमा फुटबलका किरण चेम्जोङ र महिलामा पारा तेक्वान्दोकी पलेशा गोबर्धन तथा जुनियरको पुरुषमा एथलेटिक्सका सन्दिप थारु र महिलामा टेबलटेनिसकी इभाना थापा रहेका छन्। प्रशासन र प्राविधकितर्फ ६ कर्मचारी पुरस्कृत भएका छन्। सर्वोत्कृष्ट परिषद् सेवा पुरस्कारको प्रशासनमा डिल्लीराम काफ्ले र प्राविधिकमा उसुका प्रकाश महर्जन, उत्कृष्ट परिषद् सेवा पुरस्कारको प्रशासनमा दीपा बास्तोला र प्राविधिकमा भारोत्तोलनका जीवन गौतम तथा परिषद् सेवा पुरस्कारको प्रशासनमा अर्जुनबहादुर कार्की र प्राविधिकमा जिम्न्याष्टिककी सजनी मानन्धर पुरस्कृत भएका छन्। 

राखेपमा करार सेवामा कार्यरत कर्मचारीतर्फ केशव खरेल सम्मानित भए भने खेल पत्रकारमा द हिमालयन टाइम्सका महेश आचार्य र राससकी मुनाकुमारी कार्की सम्मानित भए। उनीहरुलाई नगद पुरस्कारसहित ट्रफी प्रदान गरिएको थियो।

उत्कृष्ट स्थानिय तहमा भरतपुर महानगरपालिका, उत्कृष्ट राष्ट्रिय खेल संघमा नेपाल ट्राइयथलन संघ र उत्कृष्ट खेल सामाग्री उत्पादकमा कामारु ट्रेडिङ प्रा.लि। सम्मानित भए। सो अवसरमा राखेपमा २५ वर्ष र २० वर्ष सेवा अवधि पूरा गरेका कर्मचारीलाई क्रमशः दीर्घ सेवा पदक र परिषद् सेवा पदक प्रदान गरिएको थियो।

उनीहरुलाई राखेपका संरक्षक प्रधानमन्त्री शेरबहादुर देउवा, युवा तथा खेलकुद मन्त्री महेश्वरजंग गहतराज, राखेपका उपाध्यक्ष शिव कोइराला, खेलकुद मन्त्रालयका सचिव डा. दामोदर रेग्मी, राखेपका सदस्य–सचिव टंकलाल घिसिङ, नेपाली सेनाका उपरथी सिताराम खड्कालगायतले भद्रकालीस्थित नेपाली सेनाको मुख्यालयमा आयोजित एक कार्यक्रमबीच पुरस्कृत गरे।

कार्यक्रमलाई सम्बोधन गर्दै प्रधानमन्त्री देउवाले सीमित श्रोत र साधनका बावजुद नेपाली खेलाडीले हासिल गरेको उपलब्धी प्रशंसानीय रहेको बताउदै खेलकुदको पूर्वाधार र खेलाडीको सुविधा बृद्धि गर्ने कुरामा सरकार प्रयत्नशील रहेको बताए।

खेलकुद मन्त्री गहतराजले प्राथमिक तहदेखि नै खेलकुदलाई शिक्षामा समावेश गर्नु पर्नेमा जोड दिदै अब आउने नियमावलीमा खेलाडीको पुरस्कारलाई कानूनी रुपमै व्यवस्था गरिएको जानकारी दिए। मन्त्री गहतराजले खेलकुदलाई उद्योगका रुपमा विकास गर्नु पर्ने, पर्यटनसंग जोड्नु पर्ने र अन्तर्राष्ट्रिय सम्बन्ध विस्तार गर्ने माध्यमका रुपमा विकसित गर्नु पर्नेमा जोड दिए।