बुन्डेसलिगामा डर्टमन्डको चोथो जित, बराबरीमा रोकियो बायर्न

काठमाडौं- जर्मन शीर्ष डिभिजनको फुटबल बुन्डेसलिगामा शनिबार राति बोरुसिया डर्टमन्डले जित निकालेको छ। डर्टमन्डको घरेलु मैदानमा सम्पन्न खेलमा उसले पाहुना टिम होफेनहाइमलाई १-० ले हराएको हो।

डर्टमनका लागि खेलको १६औं मिनेटमा मार्को रिउसले गोल गरेका थिए। उनको त्यो गोलले बनाएको अग्रता बचाउँदै डर्टमन्डले जित निकालेको हो।

यता, बायर्नले भने लिगमा दोस्रो बराबरी खेलेको छ। उसले शनिबार रातिको खेलमा युनियन बर्लिनसँग १ –१ को बराबरी खेलेको हो।

बायर्नका लागि खेलको १५औं मिनेटमा जुसुवा किमिचले गोल गरेका थिए। यता, १२औं मिनेटमै एक गोलले पछि परेको अवस्थाबाट बायर्नले गोल गर्दै खेललाई बराबरीमा ल्याएको हो। यो बराबरीसँगै बायर्न तेस्रो स्थानमा झरेको छ।

चार खेलमा जित निकालेको फ्रिइबर्ग १२ अंकका साथ शीर्षस्थानमा उक्लिएको छ भने समान १२ अंक भएको डर्टमन्ड दोस्रो स्थानमा रहेको छ। बयर्नसँग बराबरी गरेको युनियन बर्लिन भने चौथो स्थानमा रहेको छ। होफेनहाइमले भने छैटौ स्थान सुरक्षित गरेको छ।