काठमाडौं- मधेश प्रदेशका मुख्यन्यायाधिवक्ता पदबाट राजीनामा दिएसँगै दीपेन्द्र झा जनता समाजवादी पार्टी (जसपा) प्रवेश गरेका छन्।
मुख्यमन्त्री लालबाबु राउतलाई उनले शनिबार आफ्नो राजीनामा पत्र बुझाएका हुन्। निर्वाचनको तयारीमा जुट्नुपर्ने भएकाले पदबाट राजीनामा दिइएको र जनता समाजवादी पार्टीमा प्रवेश गर्न लागेको मुख्य न्यायाधिवक्ता झाले बताए।
मंसिर ४ गते हुने निर्वाचनमा महोत्तरी क्षेत्र नं ३ बाट प्रतिनिधि सभा सदस्य पदमा उम्मेदवारी दिने तयारीमा रहेका झा (जसपा) प्रवेश गरेका हुन्।
शनिबार नै जसपा अध्यक्ष उपेन्द्र यादवले झालाई पार्टी प्रवेश गराएका हुन्। मधेश प्रदेश सरकार गठन भएदेखि प्रदेश सरकारको मुख्य न्यायाधिवक्ताको पदमा उनी कार्यरत रहँदै आएका थिए।
शनिबार महोत्तरीमा आयोजित पार्टी प्रवेश कार्यक्रममा जसपा अध्यक्ष उपेन्द्र यादव, मधेशका मुख्यमन्त्री लालाबाबु राउत लगायतले झालाई स्वागत गरेका छन्।