कांग्रेस केन्द्रीय सदस्य दहितको बर्दिया २ बाट सिफारिस भएन

काठमाडौं- नेपाली कांग्रेसका केन्द्रीय सदस्य गोपाल दहित आफ्नो निर्वाचन क्षेत्रबाट प्रतिनिधिसभा सदस्यको उम्मेदवार हुनका लागि सिफारिसमा पर्न सकेनन्। 

कांग्रेसको बर्दिया क्षेत्र नम्बर २ को क्षेत्रीय समितिले उनको नाम बाहेक अन्यको नाम सिफारिस गरेर जिल्ला कार्यसमितिमा पठाएको छ। 

२०७४ सालको चुनावमा दहित नेपाली कांग्रेसका तर्फबाट उम्मेदवार बनेका थिए। राजापुर नगरपालिकाको मेयर र आफ्नै वडाको वडा अध्यक्षलाई अन्तर्घात गरेको उजुरी जिल्ला अनुशासन समितिमा परेपछि अनुशासन समितिले उनलाई स्पष्टीकरण सोधेको थियो। तर, उनले स्पष्टीकरणको जवाफ नै दिएनन्। 

राजापुरको मेयरका उम्मेदवार दिपकजंग शाह नै बर्दिया क्षेत्र नम्बर २ का क्षेत्रीय सभापति हुन्।  पार्टीको १४औं महाधिवेशनमा खुलातर्फ केन्द्रीय सदस्य निर्वाचित भएका दहित विजय कुमार गच्छेदारको फोरम लोकतान्त्रिक कांग्रेससँग एकीकरण हुँदा कांग्रेसमा समाहित भएका हुन्। 

बर्दिया क्षेत्र नम्बर २ कार्यसमितिले प्रत्यक्षतर्फ पार्टीका केन्द्रीय सहमहामन्त्री किशोरसिंह राठोर, प्रधानमन्त्री पत्नी नेतृ डा. आरजु राणा देउवा, जिल्ला सभापति अरुणप्रकाश सिंह राठोर, महासमिति सदस्य जन्मजय तिमिल्सिना, जिल्ला सचिव जग्गाप्रसाद पाण्डे, महासमिति सदस्य परशुराम चौधरी र पूर्व जिल्ला सदस्य भागिराम चौधरीको नाम सिफारिस गरेर जिल्ला कार्यसमितिलाई बुझाएको छ।