विष्णु पाैडेलसँग भिड्न गृहमन्त्री खाण सिफारिस

बुटवल- नेपाली कांग्रेसले रूपन्देही-२ बाट गृहमन्त्री बालकृष्ण खाणलाई प्रतिनिधिसभा निर्वाचनमा उम्मेदवार बनाउन सिफारिस गरेकाे छ। 

यसअघि निर्वाचन क्षेत्र नम्बर ३ बाट लडेका गृहमन्त्री खाणलाई पहिलाे नम्बरमा राखेर कांग्रेसले आगामी मङ्सिर ४ मा हुने प्रतिनिधिसभा सदस्य निर्वाचनका लागि प्रत्यक्षतर्फ क्षेत्र नम्बर २ बाट सिफारिस भएको हो।

नेपाली कांग्रेस २ नम्बर क्षेत्रीय समितिको बिहीबार बसेको बैठकले यस्ताे गृहमन्त्री खाणसहित ५ जनाको नाम  सिफारिस गरेको छ। खाणसँगै युवराज गिरी, चुन्नु प्रसाद पौडेल, गोकर्ण पौडेल र कृष्णप्रसाद पोखरेलको नाम सिफारिस भएको क्षेत्रिय सचिव विमलराज भट्टराईले जानकारी दिए। 

रुपन्देही–२ मा पूर्वअर्थमन्त्री एवम् एमाले उपाध्यक्ष विष्णु पौडेलले टिकट पाउने निश्चित जस्तै छ। निर्वाचन क्षेत्र नं २ मा पाैडेलले लगातार ३ पटक चुनाव जितेका छन्। खाणकाे नाम २ बाट सफारिस भएपनि ३ बाटै लड्ने तयारी भइरहेको क्षेत्रीय सभापति सुशील गुरुङले बताए।

रुपन्देही-२ मा गठबन्धनबाट नेकपा एकीकृत समाजवादीले राजु गुरूङलाई अगाडि सारिसकेकाे छ। गृहमन्त्री खाणले २०४८ सालमा बुटवल क्षेत्रबाट सांसद बनेका थिए।