धनकुटाबाट सुनीलबहादुर सर्वसम्मत सिफारिस

काठमाडौं– नेपाली कांग्रेसका केन्द्रीय सदस्य सुनीलबहादुर थापा धनकुटाबाट प्रतिनिधिसभाको उम्मेदवारमा सर्वसम्मत सिफारिस भएका छन्।

एउटामात्रै निर्वाचन क्षेत्र रहेको धनकुटामा नेपाली कांग्रेसको क्षेत्रीय, जिल्ला समिति तथा महाधिवेशन प्रतिनिधिलगायतको बैठकले सर्वसम्मत सिफारिस गरेको हो। 

तत्कालीन राप्रपाका नेता थापालाई २०७४ सालको निर्वाचनमा समेत नेपाली कांग्रेसले सहयोग गरेको थियो तर सो निर्वाचनमा थापा एमाले नेता राजेन्द्र राईसँग पराजित भएका थिए। थापा दोस्रो संविधानसभा निर्वाचन २०७० मा तत्कालीन राप्रपाको तर्फबाट धनकुटा–२ बाट निर्वाचित भएका थिए।

त्यो बेला धनकुटा दुई निर्वाचन क्षेत्रमा विभाजित थियो। उनी सुशील कोइराला प्रधानमन्त्री हुँदा वाणिज्य तथा आपूर्ति र शेरबहादुर देउवा प्रधानमन्त्री हुँदा उद्योग मन्त्री भइसकेका छन्।

पिता सूर्यबहादुर थापाको मृत्युपश्चात् उनी राप्रपाको राजनीति त्यागेर २०७७ सालमा नेपाली कांग्रेस प्रवेश गरेका थिए। कांग्रेस प्रवेश गरेपछि उनलाई सहमहामन्त्री बनाइएको थियो।