काठमाडौं– गत सिजन आफ्नै पुरानो क्लब म्यान्चेस्टर युनाइटेड फर्किएका पोर्चुगिच कप्तान क्रिष्टियानो रोनाल्डो नयाँ सिजन सुरु भएसँगै क्लब छाड्न चाहेका थिए। लामो समय रोनाल्डोको ट्रान्सफरको विषयमा बहस जारी छ।
युनाइटेड यसपटक च्याम्पियन्स लिगमा छनोट हुन नसकेपछि उनी क्लबमा बस्न चाहेका छैनन्। रोनाल्डोका एजेन्ट पनि रोनाल्डोलाई अन्य क्लबमा ट्रान्सफर गर्न अरु क्लबसँग छलफल गरिरहेको बताइएको छ। तर युनाइटेडका प्रशिक्षक एरिक टेन ह्यागले ३७ वर्षे रोनाल्डो क्लबमै रहने बताएका छन्। रोनाल्डोसँग क्लब खुशी रहेको उनले बताए।
उनले भनेका छन्, ʽरोनाल्डोसँग क्लब खुशी छ र रोनाल्डो पनि क्लबमै खुशी छन्। गत सिजन आफ्नै पुरानो क्लबमा फर्किन पाउँदा रोनाल्डो पनि खुशी छन्। हामी सँगै मिलेर यो सिजन सफल बनाउनेछौं। धेरै उपाधिहरु जित्नेछौं। सिजनको सुरुवातदेखि नै हामीले यो योजना बनाएका थियौं।ʼ
रोनाल्डो युनाइटेड फर्किएपछि उनी नै युनाइटेडको शिर्ष गोलकर्ता समेत हुन्। उनले गत सिजन २४ गोल गरेका थिए। तर यो सिजन उनले गोलको खाता खोल्न सकेका छैनन्।