बायर्नको फराकिलो जितमा मानेको पनि गोल

काठमाडौं- इंग्लिस क्लब लिभरपुलबाट यो वर्ष जर्मन क्लबमा सरुवा भएका सेनेगलका फरवार्ड साडियो मानेले बार्यनबाट गोल गरेका छन्। जर्मन कपमा यो उनको पहिलो गोलसमेत हो।

यसअघि उनले बुन्डेसलिगामा एक पेनाल्टी गोलसहित तीन गोल गरिसकेका छन्। यसर्थ बुधबार राति उनले क्लबका लागि चौथो गोल गरेका हुन्।

जर्मन कपको गए रातिको खेलमा बायर्नले भिक्टोरिया कोल्नविरुद्ध ५–० को फराकिलो जित निकालेको थियो। यसक्रममा मानेले खेलको ५३औं मिनेटमा गोल गरेका थिए।

खेलको ३५औं मिनेटमा गोल गर्दै रायन ग्रावेन्बेर्चले अग्रता बनाएका थिए। त्यस्तै, माथ्थिउस टेलले ४५ औं मिनेटमा गोल गरे। मानेले ५३औं मिनेटमा, जमल मुसियालाले ६७औं मिनेटमा र लियोन गोरेट्काले ८२ औं मिनेटमा गोल गरेका थिए। यो जितसँगै बार्यन दोस्रो चरणमा प्रवेश गरेको छ।