७ वर्षदेखि कर नतिर्ने काठमाडौं फनपार्कलाई महानगरको २४ घण्टाको अल्टिमेटम

काठमाडौं- विगत सात वर्षदेखि कुनै पनि कर नितिरेको काठमाडौं फनपार्कलाई कर तिर्न काठमाडौं महानगरपालिकाले २४ घण्टाको अल्टिमेटम दिएको छ। महानगरपालिकाले बुधबार फनपार्कलाई एक पत्र पठाउँदै भनेको छ, '...व्यवसाय कर र बहाल कर सम्बन्धित वडा कार्यालय र विज्ञापन कर तथा मनोरञ्‍जन कर महानगरपालिकाको राजश्‍व विभाग बबरमहलमा गइ पत्र प्राप्त भएको मितिले २४ घण्टाभित्र सम्पूर्ण बाँकी रकम र सोक लाग्‍ने जरीवानासमेत दाखिला गर्नुहुन अनुरोध छ।' 

तोकिएको समयभित्र नबुझाउमा फनपार्क शिलबन्दी गरि तिर्नुपर्ने राजश्व सरकारी बाँकी सरह अशुलउपर गरिनेसमेत महानगरले चेतावनी दिएको छ। महानगरपालिकाका अनुसार वडा नम्बर २८ मा समाज कल्याण परिषद्को जग्गा भाडामा लिएर व्यवसाय गर्दै आएको फनपार्कले २०७२ सालदेखि व्यवसाय कर, बहाल कर, मनोरञ्जन कर तिरेको छैन।

फनपार्कले वर्षमा व्यवासय करबापत करिब २० हजार रुपैयाँ तिर्नुपर्ने राजस्व विभाग प्रमुख शिवराज अधिकारीले बताए। यस्तै, फनपार्कले मनोरञ्जन कर पनि महाननगरलाई नबुझाएको पाइएको छ। फनपार्कमा दैनिक सयौंको संख्यामा पैसा तिरेर जाने गरेका छन्। 

मनोरञ्जन करमार्फत् महानगरले आगन्तुकले तिरेको पैसामध्ये ५ प्रतिशत लिन्छ। उक्त रकममध्ये ६० प्रतिशत महानगर र बाँकी ४० प्रतिशत प्रदेश सरकारको खातामा जाने अधिकारीले जानकारी दिए। फनपार्कलाई बहाल लगाएको समाज कल्याण परिषद्ले पनि बहाल कल तरिको छैन। महानगरपालिकालाई फनपार्क र समाज कल्याण परिषद्बीचको बहाल सम्बन्धीको सम्झौता पत्र पनि नदिइएको अधिकारीले जानकारी दिए।