महाभियोग सिफारिस समितिमा बयान दिन पुगे निलम्बित प्रधानन्यायाधीश राणा

काठमाडौं– महाभियोग लागेका निलम्बित प्रधानन्यायाधीश चोलेन्द्रशमशेर राणा संघीय संसद् सचिवालय सिंहदरबार पुगेका छन्। प्रतिनिधिसभाले गठन गरेको महाभियोग सिफारिस समितिमा बयान दिन उनी सिंहदरबार पुगेका हुन्। 

राणाविरुद्ध महाभियोग प्रस्ताव दर्ता भएको ६ महिनापछि संसदीय समितिले उनीसँग आज बयान लिँदैछ। समितिले केही दिनअगाडि राणाविरुद्ध प्रमाण पेस गर्ने सार्वजनिक सूचना जारी गरेको थियो। संस्थागत रुपमा नेपाल बार एशोसिएसन, सर्वोच्च अदालत बार एशोसिएसन, पूर्व न्यायाधीश फोरमले आफूसँग भएका प्रमाण पेस गरेका छन्। व्यक्तिगत रुपमा चार वटा प्रमाण इमेलमार्फत समितिमा प्राप्त भएको बताइएको छ।

समितिले केही दिनअघि राणाविरुद्ध महाभियोग पुष्टि हुने प्रमाण भए उपलब्ध गराउन सार्वजनिक सूचना जारी गरेको थियो। २०७५ पुसमा प्रस्तावित प्रधानन्यायाधीशको रुपमा संसदीय समितिमा उपस्थित भएका राणा त्यसको करिब ३ वर्ष ८ महिनापछि पुनः संसदीय समितिमा बयानका लागि उपस्थित हुन लागेका छन्। 

राणाविरुद्ध गत फागुनमा महाभियोग प्रस्ताव संसदमा दर्ता भएको हो।