बढ्दै 'प्रकाश'को डिमान्ड, शो थप्दै मल्टीप्लेक्स

काठमाडौं- चलचित्र 'प्रकाश'को व्यापार बढ्दै गएपछि मल्टीप्लेक्सहरुले पूर्व निर्धारित शोमा वृद्धि गरेका छन्। चलचित्रको व्यापारमा 'अफ डे' मानिने आइतबार र सोमबार पनि चलचित्रको अकुपेन्सी उल्लेख्य रहेको भन्दै मंगलबारबाट चलचित्रको शो थपिएको हो। मंगलबार परेको हरितालिका तिजलाई समेत ध्यानमा राखेर मल्टीप्लेक्सहरुले शो थपेको बुझिएको छ।

माउथ पब्लिसिटीमा अब्बल साबित भएको 'प्रकाश'का लागि क्यूएफएक्स च्यानलले दुई शो थप गर्दै २८ शो उपलब्ध गराएको छ भने बिग मुभिजले पनि दुई शो थप गर्दै चार शो उपलब्ध गराएको छ। यस्तै बिश्वज्योति सिनेप्लेक्सले पाँच शो, वान सिनेमाले आठ शो उपलब्ध गराएको छ। यस्तै बिएसआर, एफक्यूव, आइएनआई सिनेमा लगायतका मल्टीप्लेक्सहरुले पनि चलचित्रको शो थप गरेका छन्।

माउथ पब्लिसिटी बलियो हुँदा हलमा दर्शकहरूको संख्या दिनदिनै बढिरहेको निर्माण टिमले जनाएको छ। दर्शकको डिमान्ड बढेकै कारण हलहरूले शो थप गरेको निर्माण टिमको भनाई छ। यति बेला सामाजिक सञ्जाल 'प्रकाश'मय बनिरहेको छ। बौद्धिक जमात देखि आम सर्वसाधारण सम्मले 'प्रकाश' हेर्न सिफारिस गरिरहेका छन्। दर्शकको प्रतिक्रिया राम्रो हुँदा चलचित्रको व्यापार आगामी दिनमा अझ बढ्ने निर्माता महेन्द्र अधिकारीको विश्वास छ। 

दिनेश राउतको निर्देशन रहेको चलचित्रमा प्रदीप खड्का, दिया मास्के, रेनु योगी, प्रकाश घिमिरे, नीरज पन्थी, गोविन्द सुनुवार, रामबाबु रेग्मी, लोकेन्द्र लेखक, दिपेन्द्र शाहीलगायतका कलाकारको अभिनय रहेको छ। विकास सुबेदीको लेखन रहेको चलचित्रमा राजेश श्रेष्ठको छायाङ्कन, जीवन थापाको सम्पादन, सुवास भुसाल, दीपक शर्मा, तारा प्रकाश लिम्बु र एलिस कार्कीको संगीत, उत्तम न्यौपानेको साउन्ड डिजाइन र शैलेश श्रेष्ठको पाश्र्व संगीत रहेको छ।