कर्णालीमा माओवादीका दुई मन्त्रीले राजीनामा दिए

काठमाडौं– कर्णाली सरकारमा सहभागी नेकपा माओवादी केन्द्रका दुईजना मन्त्रीले राजीनामा दिएका छन्।

आर्थिक मामिला तथा योजना मन्त्री विन्दमान विष्ट र जलस्रोत तथा उर्जा विकास मन्त्री गणेशप्रसाद सिंहले आइतबार दिउँसो मुख्यमन्त्री जीवनबहादुर शाहीसमक्ष राजीनामा बुझाएका हुन्।

माओवादी केन्द्रले शुक्रबार मन्त्री विष्ट र सिंहलाई फिर्ता बोलाउन गरेको निर्णय  मुख्यमन्त्रीकहाँ पठाएको थियो। उक्त निर्णयअनुसार नै दुई मन्त्रीले आज राजीनामा दिएका हुन्। राजीनामा पत्र बुझेर मुख्यमन्त्री शाहीले स्वीकृतसमेत गरिसकेका छन्।

मन्त्री विष्ट र सिंहको राजीनामापछि माओवादीले मन्त्रीमा सिफारिस गरेका जाजरकोटकी सांसद कृष्णा शाह र रुकुम पश्चिमका रातो कामीलाई मुख्यमन्त्री शाहीले सोमबार नियुक्त गर्नेछन्।