रोमासँग बराबरीमा रोकियो युभेन्टस, मिलानलाई सफलता

काठमाडौं- प्रशिक्षक होसे माउरिन्होलाई भित्र्याएपछि टिम बिल्डिङमा लागेको इटालियन क्लब रोमाले शनिबार राति युभेन्टससँग बराबरी खेलेको छ। शीर्ष डिभिजनको सिरी ए अन्तर्गत युभेन्टसको मैदानमा भएको खेलमा एक गोलले पछि परेको अवस्थाबाट रोमाले बराबरी गरेको हो।

युभेन्टसका लागि दोस्रो मिनेटमै डुसन भ्लाहोविचले गोल गरेका थिए। पहिलो हाफमा एक गोलले पछि परे पनि रोमाका ट्यामी अब्राहमले खेलको ६९औं मिनेटमा गोल गर्दै खेललाई बराबरीमा ल्याएका थिए।

शनिबार राति नै सान सिरो रंगशालामा भएको खेलमा एसी मिलानले बोलोग्नाविरुद्ध २–० को जित निकालेको छ। रोफेल लियो र ओलिभिए जिरुले गोल गरेपछि मिलानले जित निकालेको हो।

यो जितसँगै सात अंक बनाएको मिलान शीर्षस्थानमा छ भने रोमा पनि शीर्ष चारमा रहेको छ। युभेन्टस भने पाँच अंकका साथ सातौं स्थानमा छ।