काठमाडौं– विश्व फुटबल महासंघ (फिफा)ले दुई साता नबित्दै अल इन्डिया फुटबल फेडेरेसन (एआईएफएफ)माथिको निलम्बन फुकुवा गरेको छ।
शनिबार बिहान फिफा काउन्सिलले भारतीय फुटबलमाथि लागेको सबै निलम्बन फिर्ताको निर्णय गरेको हो। भारतको सर्वोच्च अदालतले कार्यकारी समिति निर्माण गरेपछि तेस्रो पक्षको हस्तक्षेप ठहर गरी फिफाले गत ३१ साउनमा निलम्बन गरेको थियो।
‘अदालतबाट स्थापित कमिटीको नियन्त्रणबाट एआईएफएफ स्वतन्त्र भएको हामीले पाएका छौं। फिफा र एएफसीले त्यहाँको आगामी परिस्थितिबारे पनि निगरानी राख्नेछ,’ फिफाको वक्तव्यमा भनिएको छ, ‘हामी निर्धारित समयमै निर्वाचन गराउन एआईएफएफलाई सहयोग गर्नेछौं।’
फिफाले आगामी ११ देखि ३० अक्टोबरसम्म हुने तय भएको फिफा यू–१७ महिला विश्वकप पूर्वनिर्धारित मिति र स्थानमै हुने जनाएको छ। निलम्बन हटेसँगै आउँदो साफ महिला च्याम्पियनसिपमा पनि भारतको सहभागिता हुनेछ। साफ महिला च्याम्पियनसिप २१ भदौदेखि ३ असोजसम्म काठमाडौंमा हुँदै छ।