कपिलवस्तुको मायादेवीमा गोली प्रहार गरी एक जनाको हत्या

बुटवल- कपिलवस्तु मायादेवी गाउँपालिकामा शुक्रबार दिउँसो अज्ञात समुहको गोली प्रहारबाट एक जनाको हत्या भएको छ। मायादेवी गाउँपालिका वडा नम्बर ६ मदरहवाका अन्दाजी ५५ बर्षका घुरहु भन्ने रामसमुझ पासीको गोली प्रहारबाट हत्या भएको हो।

पासीका परिवारका सदस्य अनुसार घरमै बसेका उनलाई दुई जना अज्ञात व्यक्तिले घरबाट बोलाई मायादेवी गाउँपालिका-५ को महादेव र बनकसियाबीचको सडकमा पुर्‍याएर गोली प्रहार गरेको प्रहरीले जनाएको छ। 

गोली लागेर गम्भीर घाइते भएका पासीको उपचारका लागि कपिलवस्तु अस्पताल ल्याउने क्रममा मृत्यु भएको हो। कपिलवस्तु अस्पतालको ईमरजेन्सीमा कार्यरत डाक्टर खगेन्द्र चौधरीका अनुसार मृतकको बायाँ तिघ्रामा एक गोली लागेर छेडिएको छ। 

तिघ्रामा गोली लागेका उनको अत्यधिक रक्रश्रावका कारण मृत्यु भएको डाक्टर चौधरीले बताए। गोली प्रहारको घटनामा संलग्नहरुको खोज तलास भइरहेको कपिलवस्तुका प्रहरी उपरीक्षक प्रेम बहादुर बस्नेतले जानकारी दिए।