बेन्जेमाले जिते यूइएफए बेस्ट प्लेयर, एन्सेलोटी उत्कृष्ट प्रशिक्षक

काठमाडौं- रियल मड्रिड तथा फ्रान्सका फरवार्ड करिम बेन्जेमाले वर्ष २०२१/२२ को युइएफए वर्ष खेलाडीको अवार्ड जितेका छन्। बिहीबार राति स्तानबुलमा सन् २०२२/२३ को च्याम्पियन्स लिगको समूह चरणको ड्र सार्वजनिक गर्ने क्रममा उनलाई यो अवार्ड बाट सम्मानित गरिएको हो। 

गत सिजन रियल म्याड्रिडलाई आफ्नो नेतृत्वमा युइएफए च्याम्पियन्स लिग जिताउन ठूलो भूमिका निभाएका उनले फ्रान्सलाई युइएफए नेसन्स लिग पनि जिताएका थिए। ३४ वर्षीय बेन्जेमाले आफ्नै क्लबका सहकर्मी थिबाउट कोउट्रा र म्यानचेस्टर सिटीका केभिन डे ब्रुइनालाई पछाडि पार्दै यो अवार्ड जितेका हुन्।

अवार्ड जित्दै बेन्जेमाले भने, ʽम साँच्चै खुशी छु, मैले यो ट्रफी पहिलो पटक जितेको हो।  तर मेरो लागि सबैभन्दा महत्त्वपूर्ण कुरा टिमसँग उपाधि जित्नु हो।ʼ 

रियल मड्रिडलाई १४औं यूईएफए च्याम्पियन्स लिगको उपाधि जिताएका एन्सोलोटीले युर्गेन क्लोप र जोसेप गार्डियोलालाई पछि पार्दै २०२१र२२ को यूईएफए पुरुष प्रशिक्षकको अवार्ड जितेका छन्।