विराटनगरको श्वेतपत्र : जम्बो कर्मचारी संयन्त्र, २ बिगाहा १७ कठ्ठा जग्गा बाँडियो

काठमाडौं- प्रदेश सरकारले कर्मचारी अभावमा सोचेजति काम गर्न नसकेको गुनासो गरिरहेका बेला विराटनगर महानगरपालिकाले भने कर्मचारीको बोझले महानगर चुस्त हुन नसकेको बताएको छ। महानगरपालिकाका प्रमुख नागेश कोइरालाले बिहीबार सार्वजनिक गरेको २२ बुँदे श्वेतपत्रको पहिलो बुँदामै कर्मचारीको संख्या ६०९ जना भएको उल्लेख गरिएको छ। 

महानगरका कर्मचारीमध्ये ३४५ जना अस्थायी/करारका कर्मचारी रहेको र २७६ जना श्रेणीविहीन छन्। 'संगठन तथा व्यवस्थापन सर्भेक्षण (ओएन्डएम)का आधारमा नगरसभाबाट स्वीकृत दरबन्दीमा कर्मचारी भर्ना गर्नुपर्नेमा सोको अबलम्बन नगरी कर्मचारी भर्ना गरिएको छ,' श्वेतपत्रमा लेखिएको छ, '६०९ जनाको जम्बो कर्मचारी संयन्त्र रहेको छ।' श्वेतपत्रमा कर्मचारीको संख्या धेरै भएको उल्लेख भए पनि दक्ष जनशक्ति र आवश्यक प्रकृतिको जनशक्तिको कमी रहेको, वडा कार्यालयहरूमा अधिकृतस्तरका वडासचिव र प्रशासनिक कर्मचारीको अभाव रहेको उल्लेख छ।

श्वेतपत्रमा महानगरपालिकाको स्वामित्वमा रहेको ६३ बिगाहा ८ कठ्ठा १२ धूर जग्गा रहेको उल्लेख छ। विगत ५ वर्षमा सार्वजनिक तथा पर्ती जग्गामध्ये मनोमानीपूर्ण तबरले १६ वटा संघसंस्थालाई २ बिगाहा १७ कठ्ठा १८ धूर वितरण भएको श्वेतपत्रमा उल्लेख छ। 

महानगरले सार्वजनिक गरेको श्वेत पत्रमा पाँच वर्षमा ८३ वटा ऐन, नियम, कार्यविधि, दिग्दर्शन, निर्देशिका जारी गरिएको उल्लेख गरेको छ।