नेपालको परराष्ट्र सम्बन्धबारे अन्तर्राष्ट्रिय सम्मेलन हुँदै

काठमाडौं– नीति अनुसन्धान प्रतिष्ठान नेपालले आउँदो १०–१२ भदौसम्म नेपालको परराष्ट्र सम्बन्धबारे अन्तर्राष्ट्रिय सम्मेलन आयोजना गर्ने भएको छ। प्रतिष्ठानका निर्देशक डा. दीपककुमार अधिकारीले पत्रकार सम्मेलन गरी उक्त कुराको जानकारी गराएका हुन्। 

सम्मेलन उद्घाटन प्रधानमन्त्री शेरबहादुर देउवाले १० भदौमा गर्नेछन् भने समापन पूर्वप्रधानमन्त्री पुष्पकमल दाहालले गर्ने कार्यक्रम छ।

सम्मेलनमा अन्तर्राष्ट्रिय सम्बन्धमा अध्ययन र कार्य गरिरहेका ४० वर्षमुनिका विज्ञ सहभागी हुनेछन्। भारतबाट ३८ जना विज्ञ आउनेछन्  भने ७० जना विज्ञ सहभागी हुने प्रतिष्ठानले बताएको छ।  

निर्देशक अधिकारीले भने, ‘नेपालले भविष्यमा कस्ता नीतिको आधारमा विश्वलाई हेर्ने भन्ने विषयमा सम्मेलनले गहन विषयवस्तु उजागर गर्नेछ।’

नयाँ विश्व व्यवस्थामा नेपालको विदेश नीतिबारे कार्यक्रमले दिशा निर्देश गर्ने कार्यक्रमका संयोजक डा. विनयकुमार मिश्रले बताए। सम्मेलनमा वातावरण, संस्कृति, विश्व राजनीति, सुरक्षा, शान्ति, स्थिरता, व्यापार, प्रविधिलगायतका विषयमा बेग्लाबेग्लै सत्रमा छलफल हुनेछ।