लेवान्डोस्कीको दोहोरो गोलमा बार्सिलोनाको जित

काठमाडौं- आइतबार राति स्पेनिस ला लिगामा बार्सिलोनाले रियल सोसिडाडविरुद्ध जित निकालेको छ। सोसिडाडकै मैदानमा सम्पन्न खेलमा बार्सिलोनाले ४–१ को जित निकालेको हो।

बार्सिलोनलाई जित दिलाउन रोबर्ड लेवान्डोस्कीले दुई गोल गरेका छन्। उनले खेलको पहिलो मिनेटमै गोल गरेर बार्सिलोनालाई अग्रता दिलाएका थिए। तर छैटौं मिनेटमै रियल सोसिडाडले गोल फर्काएपछि पहिलो हाफ १–१ को बराबरी भएको थियो।

खेलको दोस्रो हाफमा भने बार्सिलोनाका लागि लेवान्डोस्कीसँगै ओउसमान डेम्बेले र अन्सु फतिले गोल गरे। दोस्रो हाफको तीन गोलसँगै बार्सिलोनाले ४–१ को जित निकालेको हो।

ला लिगामा नै गएराति भएको खेलमा एट्लेटिको मड्रिडले भिल्लारियलसँग २–० को हार बेहोरेको छ भने भ्यालेन्सिया पनि एथ्लेटिक क्लबसँग पराजित भएको छ।

गएरातिको जितपछि दुई खेलबाट चार अंक बनाएको बार्सिलोना लिगको पाँचौ स्थानमा उक्लिएको छ भने पराजित सोसिडाड तीन अंककासाथ १०औं स्थानमा छ। त्यस्तै, भ्यालेन्सियालाई हराएको एथ्लेटिक क्लब सातौं स्थानमा र भिल्लारियल शीर्षस्थानमा छ।