पूर्व मेयर र उपमेयरसहित पाल्पामा एमालेका १७ जना नेकपा एस प्रवेश

बुटवल- पाल्पामा पूर्व मेयर र उपमेयरसहित नेकपा एमालेका १७ जना नेता नेकपा एकीकृत समाजवादी (एस)मा प्रवेश गरेका छन्।

तानसेन नगरपालिकाका निवर्तमान मेयर अशोक कुमार शाही र पूर्वउपमेयर लक्ष्मीदेवी पाठकलगायतले आइतबार संयुक्त विज्ञप्ति निकाल्दै एमाले प्रवेश गरेको बताएका हुन्। उनीहरुले व्यक्तिवाद, नातावाद र कृपावादलाई प्रश्रय दिने काम बढ्दै गएको आरोप लगाएका छन्।

एमाले छाड्नेमा नेताहरू भिमबहादुर कुमाल, रामप्रसाद घिमिरे, शिव थापा, बिनिता लुइँटेल, सुजेन्द्र कार्की, बुद्दे सार्की, कृष्णबहादुर केसी, लक्ष्मण कार्की, मधु कार्की, बिनोद लुइँटेल, कृष्णकुमारी केसी, माधवप्रसाद पाठक, केशवप्रसाद घिमिरे, कृष्णप्रसाद पाठक र उमेश घिमिरे छन्।

नागरिकले विश्वास गरेकै कारण दुई तिहाइ जनमत प्राप्त उपलब्धिलाई जोगाउन नसक्नु, २-२ पटक संसद् विघटन गर्नु र सर्वोच्च अदालतले असंवैधानिक ठहर गरी संसद पुनर्स्थापना गर्दा पनि पार्टीभित्र समीक्षा गर्न तयार नभएको भन्दै पार्टीबाट विद्रोह गरेको विज्ञप्तिमा उल्लेख छ।