पाकिस्तान र भारत दुबैका लागि युद्ध राम्रो विकल्प होइन : शहबाज सरिफ

इस्लामावाद- पाकिस्तानका प्रधानमन्त्री शहबाज सरिफले आफ्नो देशले भारतसँग दीर्घकालीन शान्ति चाहेको र दुई छिमेकी मुलुकका लागि युद्ध राम्रो विकल्प नभएको बताएका छन्। 

अमेरिकाको हार्वर्ड युनिभर्सिटीका विद्यार्थीहरूको एक समूहसँग कुरा गर्दै उनले भने, 'हामी वार्ताको माध्यमबाट भारतसँग स्थायी शान्ति चाहन्छौं किनभने युद्ध कुनै पनि देशका लागि राम्रो विकल्प होइन।'

सरिफले दक्षिण एसियामा दिगो शान्ति पाकिस्तान अधिनस्थ कश्मीर (पीओके) को समाधानसँग जोडिएको पनि बताए। दक्षिण एशियामा दिगो शान्ति संयुक्त राष्ट्रसंघको प्रस्ताव र कश्मीरीहरूको इच्छाअनुसार जम्मू र कश्मीर मुद्दाको समाधानसँग जोडिएको प्रधानमन्त्री सरिफलाई उद्धृत गरी द न्यूज इन्टरनेसनलले जनाएको छ।

आणविक सम्पत्ति र पाकिस्तानको व्यावसायिक तालिम प्राप्त सेनाको बचाउ गर्दै उनले भने, 'हामी हाम्रो सीमाको रक्षाका लागि हाम्रो सेनामा खर्च गर्छौं, आक्रमणका लागि होइन। इस्लामावाद र नयाँ दिल्लीबीच व्यापार, अर्थतन्त्र र दुई देशका जनताको आर्थिक तथा सामाजिक अवस्था सुधारका लागि सहकार्य हुनुपर्छ।'

राष्ट्रिय अर्थतन्त्र र अन्तर्राष्ट्रिय मुद्रा कोष (आईएमएफ) कार्यक्रमका बारेमा सोधिएको एक प्रश्नको जवाफमा प्रधानमन्त्री सरिफले पाकिस्तानको आर्थिक संकट हालैका दशकहरूमा राजनीतिक अस्थिरतासँगै आएको संरचनागत समस्याका कारण उत्पन्‍न भएको बताए।