विराटनगरमा राधाकृष्णको रथयात्रा (तस्बिरहरु)

विराटनगर- विराटनगरमा ५४ औं संस्करणको रथयात्रा भव्य रुपमा निकालिएको छ। विगतका दुई संस्करण कोरोना महामारीका कारण रथयात्रा हुन सकेको थिएन। 

विराटनगर १ राधाकृष्ण मन्दिर परिसरबाट दिउँसो साढे ३ वजे निकालिएको रथयात्राले ९ किलोमिटर दुरी पारगर्दै सोही स्थानमा पुगेर समापन हुनेछ।

रथयात्रामा दर्शनार्थीको सहभागिता उल्लेख्य रहेको राधाकृष्ण मन्दिर व्यवस्थापन समितिका अध्यक्ष तथा रथयात्रा मुल समारोह समितिका संयोजक कैलाश रेग्मीले बताए। 

विक्रम संवत १९८८ सालबाट सुरु भएको खटयात्रालाई २०२५ सालदेखि रथयात्रामा परिणत गरिएको हो। रथयात्राका लागि २२ फिट लम्बाई, १४ फिट चौडाई र १८ फिट उचाईको रथ तयार पारिएको थियो। विराटनगरको रथयात्रालाई दक्षिण एसियाकै दोस्रो ऐतिहासिक रथयात्रा मान्ने गरिन्छ। 

र‍थयात्रा सुरु गर्नुअघि भगवान् श्रीराधाकृष्णको मूर्तिलाई खटमा राखी काँधमा बोकेर नगरपरिक्रमा गराउने प्रचलन थियो। खटयात्रालाई रथयात्रामा रूपान्तरण गरिएयता परम्परागत शैलीको आधुनिक रथमा भगवान् श्रीराधाकृष्णको मूर्ति राखेर नगर परिक्रमा गराउने गरिएको श्रीराधाकृष्ण समारोह समितिका अध्यक्ष रेग्मीले बताए।

रथयात्राको अवलोकन गर्न नेपालका विभिन्न जिल्ला र छिमेकी मुलुक भारतबाट समेत हजारौँ भक्तजन आउने गरेका छन्।