काठमाडौंमा 'घर निर्माण फेस्ट' हुने, विश्वकै ठूलो आकारको इट्टादेखि उल्टो घरसम्म प्रदर्शनीमा राखिने

काठमाडौं- घर निर्माण फाउण्डेसनले घर निर्माण फेस्ट-२०८२ आयोजना गर्ने भएको छ। निर्माण सम्बन्धी नेपालको सबैभन्दा ठूलो मेलाका रूपमा आयोजना हुने यो फेस्ट दोस्रो संस्करण हो।

नेपालको निर्माण व्यवसाय क्षेत्रलाई आधुनिक प्रविधिको प्रयोग मार्फत नयाँ उचाइमा पुऱ्याउने उद्देश्यसहित यो फेस्ट आगामी पुस १२ देखि १५ गतेसम्म काठमाडौंस्थित भृकुटीमण्डपमा आयोजना हुने भएको छ।

नेपालमा निर्माण तथा व्यावसायिक गतिविधि बढ्दै गए पनि धेरै ब्रान्डहरूले अझै पनि समान रूपमा ब्रान्ड प्रस्तुत गर्न, ग्राहकसँग प्रभावकारी सम्बन्ध स्थापित गर्न तथा आफ्ना उत्पादनलाई व्यवस्थित र आकर्षक रूपमा प्रदर्शन गर्न विभिन्न चुनौती झेलिरहेका छन्। यही कमीकमजोरीलाई सम्बोधन गर्न घर निर्माण फेस्ट आयोजना गर्न लागिएको हो।

प्रदर्शनीमा हुने विशेषज्ञ मार्गदर्शन, प्रत्यक्ष अन्तरक्रिया तथा ब्रान्डिङ परामर्श मार्फत व्यवसायीले आफ्ना उत्पादन लक्षित ग्राहकसम्म पुऱ्याउन सक्नेछन्। दोस्रो संस्करणको घर निर्माण फेस्टलाई हामीले साधारण मेला मात्र नभई व्यवसायमुखी, अवलोकन-केन्द्रित र परिणाममुखी बनाउने तयारी आयोजकको छ।

चार दिनसम्म हुने प्रदर्शनीमा हामीले २ सय करोड बढीको आर्थिक कारोबार हुने अपेक्षा आयोजकले गरेको छ। घर निर्माण सम्बन्धी यस प्रदर्शनीमा ४० हजार बढी दर्शकले निर्माण सम्बन्धी प्रत्यक्ष रूपमा अवलोकन गरी जानकारी लिने अनुमान गरिएको छ।

घर निर्माण फेस्टको आकर्षणका रूपमा विश्वकै सबैभन्दा ठूलो आकारको इट्टा तयार पारिएको छ। जसलाई ‘गिनिज बुक अफ वर्ल्ड’ रेकर्डमा समावेश गर्ने तयारी गरिएको छ। यसअघि सन् २००७ जुलाई ४ मा अमेरिकाको टेक्सासस्थित एक कम्पनीले विश्वकै सबैभन्दा ठूलो आकारको इट्टा निर्माण गरेको थियो।

त्यस्तै दोस्रो आकर्षणका रूपमा उल्टो घर लाई प्रदर्शनीका क्रममा राखिने छ। जसमा घरको सबै संरचना र डिजाइन उल्टो रूपमा प्रदर्शन गरिनेछ। यस्तै प्रदर्शनीका क्रममा नेपालमा त्यति धेरै प्रयोगमा नआएको ‘डोम हाउस’ को अवधारणा पनि प्रस्तुत गरिनेछ।

यस प्रदर्शनीको क्रममा अवलोकनकर्ताहरूले प्रत्यक्ष रूपमा निःशुल्क रूपमा इन्जिनियर, आर्किटेक्ट, निर्माण सामग्री विशेषज्ञ तथा उद्योगका अनुभवी व्यक्तिहरूसँग अन्तर्क्रिया गर्न पाउनेछन्। अवलोकनकर्ताले आफ्ना घर निर्माणसम्बन्धी जिज्ञासा, निर्माण सामग्रीका छनोट, डिजाइन, लागत, गुणस्तर तथा आधुनिक प्रविधिबारे विशेषज्ञसँग जानकारी लिन सक्नेछन्।