गिरीको स्वास्थ्य अवस्था बुझ्न मेडिसिटी पुगिन् राष्ट्रपति भण्डारी

काठमाडौं- राष्ट्रपति विद्यादेवी भण्डारीले कांग्रेस नेता प्रदीप गिरीको स्वास्थ्य अवस्थाबारे जानकारी लिएकी छन्। राष्ट्रपति भण्डारीले ललितपुरस्थित मेडिसिटी अस्पताल पुगेर उपचारार्थ नेता गिरीको स्वास्थ्यबारे जानकारी लिँदै स्वास्थ्यलाभको कामना गरेकी छन्।

शनिबार ११ बजे मेडिसिटी अस्पताल पुगेकी राष्ट्रपति भण्डारीलाई अस्पताल सञ्चालक समिति अध्यक्ष डा.उपेन्द्र महतोले नेता गिरीको स्वास्थ्य अवस्थाबारे जानकारी गराएको राष्ट्रपतिको सचिवालयले जनाएको छ।

राष्ट्रपति करिब एक घन्टासम्म अस्पतालमा रहेकी थिइन्। 

प्रतिनिधिसभा सदस्य गिरी लामो समय भारतको मुम्बईका विभिन्न अस्पतालमा घाँटीको क्यान्सरको सफल उपचारपछि केही महिनाअघि नेपाल फर्किएका थिए।

नेपाल फर्किनासाथ निमोनिया देखिएपछि नेता गिरीलाई थप उपचारका लागि गत ९ साउनमा मेडिसिटी अस्पताल भर्ना गरिएको थियो। डा.पंकज वर्मन नेतृत्वको चिकित्सक टोली उनको उपचारमा संलग्न छ।