प्रदीप गिरी आईसीयूमै

काठमाडौं- नेपाली कांग्रेसका नेता तथा सांसद प्रदीप गिरिको सघन उपचार कक्ष (आईसीयू) मा उपचार भइरहेको छ।

स्वास्थ्यमा समस्या देखिएपछि साउन दोस्रो साता ललितपुरस्थित मेडिसिटी अस्पतालमा भर्ना भएका गिरीको स्वास्थ्यमा सुधार नआएपछि आईसीयूमा सारेर उपचार जारी रहेको गिरिका स्वकीय सचिव कृष्ण खनालले बताए।

गिरिको स्वास्थ्यमा थप समस्या भएकाले शुक्रबार दिउँसोदेखि कसैलाई भेट्न नदिइएको उनले जानकारी दिए। 

गिरिको घाँटीमा क्यान्सर भएपछि गत वर्ष साउनमा उपचारका लागि भारतको मुम्बई लगिएको थियो। करिब एक वर्ष उपचार गरेपछि उनलाई साउनमा नेपाल ल्याइएको थियो। पछिल्लो समय उनलाई निमोनियाले च्यापेपछि मेडिसिटी अस्पतालमा भर्ना गरिएको थियो।

अस्पतालका डा.पंकज वर्मनसहितको चिकित्सक टोलीले गिरिको उपचार गरिरहेको छ। घाँटीमा देखिएको क्यान्सर पछिल्लो समय शरीरका अन्य भागमा पनि फैलिँदै जाँदा र निमोनियासमेत हुँदा गिरिलाई थप समस्या भएको चिकित्सकले बताएका छन्।

सामाजिक सञ्जालमा गिरीबारे हतारमा लेखेका कुराले दुःखि तुल्याएको अस्पताल प्रशासनले जनाएको छ।

कांग्रेस महामन्त्री विश्‍वप्रकाश शर्माले यतिबेला उनलाई प्रार्थनाको जरुरी रहेको बताएका छन्। उनले सामाजिक सञ्‍जालमा लेखेका छन्, 'अनेक हल्लाहरु केवल हल्ला मात्र हुन्। जीवनका लागि संघर्षरत आदरणीय अग्रज बौद्धिक व्यक्तित्व प्रदिप गिरी अस्पतालबाट स्वस्थ भएर घर फर्किन सक्नुहोस्। सबैले यहि कामना गरौं!'

शुक्रबार दिउँसो कांग्रेस नेता बिमलेन्द्र निधि अस्पतालमै पुगेर  गिरीको स्वास्थ्य अवस्थाबारे बुझेका छन्। अस्पतालबाट फर्केर गिरीको स्वास्थ्य लाभको कामना गरेका थिए। निधिले भनेका छन्,'मेडिसिटीमा दोस्रो पटक प्रदिप गिरीलाई भेटेर बाटोमा फर्किदैछु। स्तब्ध र निरिह छु। ईश्वरी चमत्कारका लागि प्रार्थना गर्दछु। सबैले प्रार्थना गरौं।'