रुपन्देही उद्योग संघले स्थापना गर्‍यो रोजगार सूचना केन्द्र

बुटवल- रुपन्देही उद्योग संघले रोजगार सूचना केन्द्रको शुभारम्भ गरेको छ। बिहिबार एक कार्यक्रमबीच लुम्बिनी प्रदेशका उद्योग, वाणिज्य तथा आपूर्तिमन्त्री अजय शाहीले उद्घाटन गरेका हुन्। लुम्बिनी प्रदेश सरकार उद्योग, वाणिज्य तथा आपूर्ति मन्त्रालय, बुटवल उपमहानगरपालिकासँगको सहकार्यमा सूचना केन्द्र स्थापना गरिएको हो।

मन्त्री शाहीले दक्ष जनशक्तिलाई स्वदेशमा नै प्रयोग गर्ने वातावरण बनाउने बताए। उनले नीजी क्षेत्रसँगको सहकार्य र सहयोगमा उद्योगको विकासका कार्यक्रमलाई अगाडी बढाएको उल्लेख गर्दै उद्योग संघले सञ्चालनमा ल्याएको रोजगार सूचना केन्द्रले श्रम शक्तिलाई आवश्यकता अनुसार काममा लगाउन महत्वपूर्ण भूमिका खेल्ने विश्वास बताए।

त्यस्तै बुटवल उपमहानगरपालिकाकी उपप्रमुख सावित्रादेवी अर्यालले श्रम शक्तिको सम्मान र उनीहरुको उचित परिचालनका गर्दै स्थानीय तहमा रोजगारीको सिर्जना गर्नमा सूचना केन्द्र उपयोगी हुने बताए। कार्यक्रममा नेपाल उद्योग परिसंघका लुम्बिनी प्रदेश अध्यक्ष एजाज आलमले रोजगार सूचना केन्द्रको स्थापनाले रोजगादाता र श्रम शक्तिबीचको सम्बन्धलाई पनि मजवुत बनाउने विश्वास व्यक्त गरे।

संघका अध्यक्ष माधव प्रसाद पौडेलले देशको श्रम शक्तिको समुचित परिचालनको व्यवस्थापन गर्नका लागि रुपन्देही उद्योग संघले पुलको काम गर्ने गरी सूचना केन्द्र स्थापना गरेको बताए। उनका अनुसार सूचना केन्द्र मार्फत रोजगारदाता र रोजगारी खोज्नेहरुलाई भेट गराउने काम गर्नेछ।