धरानका मेयर साम्पाङले सार्वजनिक गरे सय दिनका काम

काठमाडौं- धरान उपमहानगरपालिकाका मेयर हर्क साम्पाङले आफूले सय दिनमा गरेका काम सार्वजनिक गरेका छन्।

मेयर भएपछि एक सय दिनभित्र के-के काम गरियो भन्ने प्रश्न सोध्नेलाई जवाफ भन्दै उनले १३ वटा काम सार्वजनिक गरेका हुन्।

बिहीबार बिहान फेसबुक पेजबाट उनले आफूले सय दिनमा गरेका १३ उपलब्धिलाई सार्वजनिक गरेका छन्। नेपालमा श्रम संस्कृति क्रान्तिको आफूले सुरुवात गरेको उनको दाबी छ।

खानेपानी धरान ल्याउन, वृक्षारोपण गर्नलगायत काममा स्थानीय बासिन्दाको श्रमदानलाई प्राथमिकता दिएको साम्पाङले उल्लेख गरेका छन्।

चार ठाउँबाट खानेपानीको मुहान थप गरेको, व्यापक जनपरिचालन र सामुदायिक सहभागीता जुटाएको, ६ लाख विरुवा रोपेको, सरसफाइमा देखिने सुधार ल्याएको उनको दाबी छ। प्रशासनिक सुधार ल्याई शान्ति सुरक्षामा सुधार ल्याएको साम्पाङले बताए।

जलविद्युतको सफल परीक्षण गरी बगरमा बत्ति बालेको, बाटो मर्मत सम्भार, टटबन्धन, विपद व्यवस्थापन, लागूऔषधविरुद्धको अभियान सुरू गरेको, योजनाका लागि बजेटको जोहो गराएकोलगायतका काम सय दिनभित्र गरिएको उनको दाबी छ।

पारदर्शी हिसाबकिताब राखेर सार्वजनिक गरेको, पालिकाका सेवामा तीब्रता र प्रष्टता ल्याइदिएको, शिक्षा, स्वास्थ्य संस्थामा सुधार ल्याएको साम्पाङले बताए।